«Շվեյցարիան ֆորմալ դեր է կատարում հայ-թուրքական գործընթացում, իսկ հայ-թուրքական պրոցեսի համար խոչընդոտ է հանդիսանում շատ ավելի առարկայական խնդիր»,- «Առաջին լրատվական»-ի հետ զրույցում կարծիք հայտնեց քաղաքագետ Երվանդ Բոզոյանը` չկապելով Հայաստանի և Շվեյցարիայի նախագահների իրար հաջորդող փոխայցելությունները հայ-թուրքական գործընթացը վերակենդանացնելու փորձերի հետ:
Հարցին, թե այդ դեպքում Հայաստանը էլ ի՞նչ հարցեր կարող է քննարկել Շվեյցարիայի հետ, Բոզոյանը պատասխանեց. «Իհարկե, էական հարցեր չկան, սակայն Հայաստանը բազմաթիվ երկրների հետ հարաբերություններ ունի, այդ թվում` Շվեյցարիայի, գուցե հենց այն պատճառով, որ Շվեյցարիան այն եզակի երկրներից է, որտեղ ՔՕ-ով պատժելի է Ցեղասպանության ժխտումը»:
Ըստ Բոզոյանի, հայ-թուրքական գործընթացը Հայաստանի և Շվեյցարիայի նախագահների փոխայցելություններով չի կարող վերակենդանանալ. «Հարցի վերակենդանացումը կապված է շատ ավելի լուրջ խնդիրների հետ, քան այսպես կոչված գաղտնի բանակցություններն են, որովհետև նման բանակցությունների արդյունքը երևում է այն ժամանակ, երբ հրապարակային պրոցեսներ են ընթանում»:
Բոզոյանի խոսքերով, այժմ որևէ գաղտնի բանակցություններ չկան, և Թուրքիան հստակ հայտարարում է, թե կա նախապայման, և դա ԼՂ հարցում առաջխաղացումն է. «Որևէ կասկած չկա, թե Թուրքիայի իշխանություններն անգամ կես քայլ կանեն, եթե ԼՂ հարցում չստանան այն լուծումը, որն իրենք ակնկալում են»: