Shana լրատվական գործակալության փոխանցմամբ՝ Թեհրանն ու Թբիլիսին բանակցություններ են վարում Վրաստանին 200 միլիոն խորանարդ մետր իրանական գազ մատակարարելու վերաբերյալ։ Այդ մասին հայտարարել է Իրանական գազի արտահանման ազգային ընկերության (NIGEC) գլխավոր տնօրեն Ալիռեզա Քամելին։
Ընդգծվում է, որ Քամելին այդ հայտարարությունն արել է երեկ Թեհրանում Իրանի նավթարդյունաբերության նախարար Բիժան Նամդար Զանգանեի ու Վրաստանի էներգետիկայի նախարար Կախա Կալաձեի միջև տեղի ունեցած բանակցություններից հետո։
Կամելին հայտարարել է, որ վրացական պետական ու մասնավոր սեկտորի ձեռնարկությունները շահագրգռված են Իրանից գազ գնելով. «Ակնկալվում է, որ Վրաստանին գազի մատակարարումները կսկսվեն իրանական հաջորդ տարում (սկսվում է մարտի 21-ին)։
Առաջին պայմանագիրը ստորագրվելու է 7 ամսով և ծառայելու է որպես բազա՝ այդ ոլորտում հետագա հնարավոր համագործակցության համար»։ Նա հավելել է, որ Վրաստանը դեռ պետք է ստանա Հայաստանի թույլտվությունը՝ գազը հարևան այդ երկրի տարածքով տարանցելու համար:
«Եթե հաստատվի գործարքի տնտեսական նպատակահարմարությունը, հետագայում խոսքը կարող է վերաբերել Վրաստանին գազ մատակարարելու միջնաժամկետ ու երկարաժամկետ պայմանագրերին»,- հավելել է նա։
