Գերագույն խորհրդի պատգամավոր Ազատ Արշակյանը «Առաջին լրատվական»-ի հետ զրույցում անդրադառնալով ՀՀԿ-ՀՅԴ կոալիցիոն համագործակցությանը՝ ասաց. «Այդ բանակցությունները թափանցիկ չեն, և մենք ստիպված ենք գուշակություններ անել»:
Մեր զրուցակցի խոսքով՝ ՀՀԿ-ի ուժից վեր է Հայաստանը քաղաքական-տնտեսական ճգնաժամից դուրս բերելը, ուստի հրավիրում է օգնական ուժի՝ Դաշնակցությանը:
«Եթե Դաշնակցությունը գալիս է Հայաստանը այս ծանր վիճակից փրկելու, ուրեմն հարց է ծագում՝ ումի՞ց փրկելու՝ ապաշնորհ, ոչ արդյունավետ կառավարող իշխանությունի՞ց: Եթե նպատակը դա է, ուրեմն հարկավոր է պատրաստվել ընտրություններին, որոնք անցկացվելու են ընդամենը մեկ տարի հետո: Իսկ այդ փրկիչ Դաշնակցությունը իր թիկունքում ունի մեկ միլիոն աղքատ, և եթե կարողանա այդ մեկ միլիոնին ապացուցել, որ գալով իշխանության՝ մեր երկրի վիճակը կբարելավի, ուրեմն մեկ տարի հետո մենք կարող ենք ձայն տալ Դաշնակցությանը»,- ասաց Ազատ Արշակյանը՝ հավելելով, որ հակառակ դեպքում այլ հարց է առաջանում՝ կապված պայմանավորվածությունների հետ:
Մեր զրուցակցի խոսքով՝ այսինքն՝ Դաշնակցությունը վստահ է, որ Հայաստանում ժողովրդավարությունն այնքան է իջնելու, որ ինքը չի կարող ներկայացված լինել իշխանություններում՝ առանց իշխանության թույլտվության. «Սա կոչվում է կապիտուլյացիա, հանձնվել, և Դաշնակցությունը հանձնվեց ապագա հաղթողի բարեհաճությանը, ընդամենը լուծում են մի քանիսին աշխատանքի տեղավորելու խնդիր»:
Ազատ Արշակյանը կարծում է, որ այդ կուսակցությունը կոտրվել է, հուսահատվել, ընկճվել է և ստիպված է ինչ-որ բան վերցնում, որպեսզի հաջորդ ընտրություններում Դաշնակցություն անունը մարգինալների մեջ չլինի. «Եթե այսպես է, և նույնիսկ Դաշնակցությունն է մտահոգվում, ուրեմն մենք պետք է անհանգստանանք, ուրեմն մեզ սպասվում է մաքուր քրեական իշխանություն՝ դաջվածքներ ունեցող մականունավորներով»:
