Եվրասիական տնտեսական միությունում միասնական արժույթի անցնելու հարց այս փուլում չի քննարկվում: Փետրվարի 8-ին լրագրողների հետ հանդիպմանն այս մասին ասել է ԵՏՀ մակրոէկոնոմիկայի և ինտեգրման հիմնական ուղղությունների կոլեգիայի անդամ Տատյանա Վալովայան: «Մենք կարծում ենք, որ տնտեսական ներկայիս պայմաններում նման քայլի գնալը ոչ միայն ժամանակավրեպ է, այլ կար ող է բացասական ազդեցություն ունենալ միության վրա, սակայն մենք պետք է ակտիվ զարգացնենք Եվրասիական տնտեսական միության ստեղծման պայմանագրում ամրագրված կետերը, որոնք վերաբերում են արժութային ոլորտում անդամ երկրների համագործակցության ընդլայնմանը»,- ասել է նա:
Վալովայան հավելել է, որ խոսքը գնում է փոխադարձ վճարումների ժամանակ ազգային արժույթների օգտագործման ընդլայնման մասին, ինչն ամրագրված է ԵԱՏՄ-ի ստեղծման մասին պայմանագրում: «Մենք հասկանում ենք, որ հիմա, երբ մեր երկրների ազգային արժույթները երրորդ երկրների արժույթների նկատմամբ արժեզրկվում են, անդամ երկրների ազգային արժույթների օգտագործման ընդլայնումը կարող է թեթևացնել իրավիճակը»,- ընդգծել է նա:
