Մայիսի 5-ին կայացած Երևանի ավագ անու ընտրությունների արդյունքում Հանրապետական կուսակցությունն ունեցավ 42, ԲՀԿ-ն 17, իսկ «Բարև Երևան»
դաշինքը` 6 մանդատ: Այժմ կուսակցությունները քննարկում են, թե ովքեր են լինելու ավագ անիում: «Ժողովուրդ»-ի տեղեկություններով, ավագանու ԲՀԿ խմբակցությունը ղեկավարելու է մշակույթի նախկին նախարար, նախկին ՕԵԿ-ական Թամար Պողոսյանը: Թերթի աղբյուրները փոխանցում են, որ ԲՀԿ առաջնորդ Գագիկ Ծառուկյանն անձամբ է որոշել, թե ովքեր են լինելու Երևանի ավագանիում: Նա, ինչպես ԱԺ ընտրությունների ժամանակ, այս անգամ էլ առաջնորդվել է տեղամասերից ստացված ձայների թվով՝ հայտարարելով, որ տեղերում պարտվածները մանդատ չեն ստանա, և նախկին ավագանու անդամներից ընդամենը 2-3 հոգի են մնալու նույն կարգավիճակում:
ԲՀԿ-ի 17-հոգանոց ավագանու կազմը 99 տոկոսով համալրվելու է նոր մարդկանցով: ԲՀԿ-ին մոտ կանգնած «Ժողովուրդ»-ի աղբյուրները հայտնել են, որ ԲՀԿ խմբակցությունում կլինեն ավագանու անդամներից Ջիվան Պողոսյանը և Արման Սահակյանը: Իսկ «Ավիա-Սերվիս»-ի փոխտնօրեն Գրիգոր Գրիգորյանը, որը ԲՀԿ ցուցակի 18-րդ համարն էր, ինքնաբացարկ կհայտնի:
