«Բավական է՝ աբսուրդ մարմիններ ձևավորեն, մեր գլխին փորձեն դատական նոր ատյաններ ստեղծեն, մամուլի նախարարություններ ձևավորեն: Այդ հասարակական կազմակերպությունները տասնյակ տարիներ շարունակ մամուլի համար Հայաստան մտնող գումարները ծախսելով են զբաղված, հիմա էլ երևի ծախսելու նոր ձև են գտել»,- «Առաջին լրատվական»-ի հետ զրույցում խոսելով ՀՀ օմբուդսմենի նախաձեռնությամբ ստեղծված տեղեկատվական վեճերի խորհրդի մասին՝ կարծիք հայտնեց «Հրապարակ» օրաթերթի գլխավոր խմբագիր Արմինե Օհանյանը:
Օհանյանը նշեց, որ այդ մարմիններում ընդգրկվածները իրավասություն չունեն և չեն կարող դատավորի դեր ստանձնել: Ըստ Օհանյանի՝ լրագրողի և մամուլի գլխին նոր մարմիններ ձևավորելը վտանգավոր է և չի կարելի նման բան թույլ տալ. «Պետք է ինչքան կարելի է՝ ազատություն տալ, ինչքան հնարավոր է քիչ օրենքներ սահմանել մամուլի գլխին, որովհետև կարգավորման մեխանիզմներ սահմանելու բոլոր փորձերը միայն մամուլը սահմանափակելու միջոցներ են դառնում»:
«Հրապարակ»-ի խմբագիրը նշեց, որ ինքը չի պատրաստվում համագործակցել Տեղեկատվական վեճերի խորհրդի հետ և խորհուրդ տվեց բոլոր լրագրողներին զերծ մնալ նման մարմիններ ձևավորելու գայթակղությունից:
