ՀՔԾ պետ Անդրանիկ Միրզոյանին աշխատանքից ազատելու հիմնական շարժառիթը շարունակում է մնալ հանրային ուշադրության կենտրոնում: Առիթը, ինչպես նշել ենք, զինվորական մի գործի՝ 2012-ի Շուշիի ՔԿՀ-ում Հայկ Մովսիսյանի ինքնասպանությունն է: Պարզելու համար, թե ինչ է եղել իրականում, «Առաջին լրատվական»-ը եղավ Մովսիսյանների տանը, որտեղ Հայկ Մովսիսյանի հայրը՝ Արտավազդ Մովսիսյանը, պատմեց դեպքի հետ կապված մանրամասներ:
2011-ի աշնանը 1993 թվականի հունվարի 6-ին ծնված Հրազդան քաղաքի բնակիչ Հայկ Մովսիսյանին տանում են բանակ՝ Մարտակերտի զորամաս: Ծառայության 20-րդ օրը, երբ հայրը պատրաստվում էր գնալ որդու երդման արարողությանը, զանգահարում-ասում են, թե երեխան հիվանդանոցում պառկած է՝ երակներն է կտրել: «Չաստի աֆիցեռսկի սաստավը շատ է նեղացրել իմ երեխային, իրենցից է սկսվել այս գործը, հնարավոր չէր, որ իմ երեխան այդպիսի բան աներ, եթե նրան չնեղեին և աստիճանաբար չհասցնեին այդ վիճակին»,- ասաց հայրը:
Որդուն տեղափոխում են «Կանազի» հոգեբուժարան, որտեղ տղան մեկ ամիս բժշկական օգնություն է ստանում, իսկ բժիշկն էլ թուղթ է տալիս, համաձայն որի՝ Հայկ Մովսիսյանը ենթակա չէ ծառայության, քանի որ նրա մոտ հայտնաբերվել է օրգանական փսիխոպաթոնման խանգարում, դեզադապտացիոն դեկոմպենսացիա սուիցիդի փորձով:
Հայկ Մովսիսյանի հայրը պատմեց, որ որդու հոգեկանը ամբողջովին խանգարվել էր, ամենաթեթև բանից նա միանգամից բռնկվում էր, և առհասարակ տղան շուտ բռնկվող էր, նյարդային, անգամ անհիմն տեղը տատիկի հետ կարող էր վիճել:
Որդուն մեկ ամիս հետո հիվանդանոցից տուն են բերում, որից 15 օր անց զինգրքույկ են տալիս՝ Սեյրան Օհանյանի ստորագրությամբ: Տղան մեկնում է մոր և քրոջ մոտ` բուժման նպատակով: Հայկ Մովսիսյանին սկսել են փնտրել՝ որպես դասալիքի, բայց նա օրինական էր ազատվել: Օդանավակայանից անմիջապես տեղափոխում են «Նուբարաշենի», ապա Շուշիի ՔԿՀ՝ չնայած այն հանգամանքին, որ քննիչին ցույց են տվել, որ նա ոչ թե փախել է, այլ իրավունք է ունեցել գնալու, քանի որ զինգրքույկ է ունեցել:
Հայրը պատմեց, որ երբ գնացել է դատավոր Սերգեյ Աղաբեկյանի մոտ, հարցրել է՝ ինչո՞ւ են որդուն հետախուզում, երբ նա օրինական կերպով ազատված է բանակից, դատավորը ի պատասխան՝ ասել է, որ լավ է անում. «Կարող եմ քո երեխուն դատել, իսկի քեզ չհարցնեմ էլ: Ասում եմ՝ ո՞նց կարող ես դատել, երբ տղաս զինգրքույկ ունի, ասաց՝ դուրս արի, տղա ջան, քեզ հետ ոչինչ չունեմ խոսելու, և դուրս հանեց ինձ: Տղաս երկու ամիս մնաց Շուշիի բերդում, որից հետո դատ նշանակվեց: Դատի օր են նշանակում, ես գնում եմ դատի, դատ չեն անում, չէին ուզում, որ ես մասնակցեմ, դատավճռի ժամն էլ չասացին, խաբեցին»,- պատմեց հայրը՝ հավելելով, որ անհիմն տեղը դատեցին տղային:
Հոր խոսքով՝ որդին ամառ-ձմեռ ձեռքերի շրջանում կապտուկներ է ունեցել, ագրեսիվ էր, բայց ծնողները որևէ կերպ չեն պատկերացրել, որ կարող է աստիճանաբար բարդանալ իրավիճակը:
«Ղարաբաղի քննիչ Ադամյանը տարավ ինձ, ասում է՝ չեմ հավատում, որ ձեր երեխան հիվանդ է, նորից հանձնաժողով կազմեց, որոշ ժամանակ անց քննիչ Ադամյանը զանգեց և ասաց, որ Ֆրանգուլյան ազգանվամբ բժշկի մոտ տանեմ տղայիս: Գնացինք իր ասած բժշկի մոտ, ինքը անգամ չեկավ էլ, պետք է կրկնակի ստուգումներ իրականացնեին, տղայիս հարցնում է՝ տղա ջան, գլխի վրա ընկե՞լ ես, ականջներդ ձայն լսո՞ւմ են. անհիմն ծիծաղելի հարցեր էին, հետո հինգ րոպեում ասաց` վեր կացեք, ամեն ինչ նորմալ է»,- ասաց Արտավազդ Մովսիսյանը: Մինչդեռ հիվանդությունը ախտորոշած առաջին բժիշկը տեղեկացրել էր, որ սա այնպիսի հիվանդություն է, որ հինգ րոպեում չէիր կարող ախտորոշել: Հայրը պնդում է, որ Ղարաբաղի դատախազին, քննիչին, դատավորին պետք է ենթարկեն կալանքի, քանի որ տղային անհիմն են դատել, և նրանք են դարձել տղայի մահվան պատճառը: Բացի այդ, հայրը նշում է, որ պետք է պատասխանատվության ենթարկել նաև Երևանի բժշիկ Ֆրանգուլյանին:
Դրանից հետո Սյունիքի մարզի ընդհանուր իրավասության առաջին ատյանի դատարանը` դատավոր Սերգեյ Աղաբեկյանի նախագահությամբ, դատավճիռ է կայացրել և Հայկ Մովսիսյանին երեք տարի ազատազրկման դատապարտել, իսկ երեք օր անց Հայկ Մովսիսյանին գտել են սավանով իրեն կախած վիճակում:
Հայրը՝ Արտավազդը, վստահ է, որ որդին ինքնասպանության չէր դիմի, եթե ճնշումներ եղած չլինեին: Նա այն կարծիքին է, որ Շուշիի ՔԿՀ-ում տղային նեղել են, ասել՝ չէիր ուզում հա՞, ծառայեիր: Մյուս հանգամանքն այն է, որ հայրը չի հասկանում` ինչպես է հնարավոր, որ տղան սավանով ինքնասպանության դիմած լինի, և կողքին ութ հոգի քնածները չտեսնեն: Հայրը նշեց, որ պայքարելու է՝ բոլոր մեղավորներին պատասխանատվության ենթարկելու համար:
Բացի այդ, Հայկը դատավճռից հետո հորից պատմական գրքեր է խնդրել՝ կարդալու, ընկճված չի եղել, վստահ է եղել, որ ինքը շուտով ազատ կարձակվի, քանի որ անհիմն են դատում: «Հնարավոր է՝ ճնշումներ են եղել»,- ասաց հայրը:
Արտավազդ Մովսիսյանը գտնում է, որ դատավորը սխալ վճիռ է կայացրել, նա առնվազն պետք է երեխային մեկ ամիս ուղարկեր ստուգման, երեխան պետք է բժշկի հսկողության տակ լիներ:
Իրեն շատ վատ է պահել նաև քննիչ Ադամյանը. «Գալիս էր իմ երեխային վերցնում՝ տանում էր, չգիտես ինչի, ստորագրություն էր վերցնում, որ այստեղից չբացակայի»:
Այս օրերին մամուլն անդրադարձավ խնդրին, ըստ որի՝ ՀՔԾ պետ Անդրանիկ Միրզոյանն այս ողջ պատմության մեջ հովանավորել է Գևորգ Կոստանյանին, սակայն հայրը և հարևանը պատմեցին, որ իրենք զինդատախազի դեմ ոչինչ չունեն. «Ես նրա դեմ լարված չեմ: Գլխավոր դատախազն ինքն անձամբ խորհուրդ է տվել շարունակել պայքարը, կրկնակի հերձման հարցով երբ դիմում գրեցինք անձամբ իրեն, անմիջապես օգնեց, իմ հորեղբոր տղան և հարևան Ապրեսն են հանդիպել նրան, ինքը միջամտել է, ասել, որ անպայման պետք է հուղարկավորությունը հետաձգել՝ կրկնակի հերձում անելու համար, ասել է՝ մեզ էլ է հետաքրքիր՝ ինչու և ինչ է եղել»,- ասաց Անդրանիկ Մովսիսյանը:
Հարևան Ապրեսը «Առաջին լրատվական»-ի հետ զրույցում պատմեց, որ երբ դիմում են տարել Գևորգ Կոստանյանին, նա անձամբ է միջամտել, որ կրկնակի դիահերձում անեն. «Ասաց՝ խնդիր չկա, զանգեց, որ շուտափույթ նոր դիահերձում անեն, այդ հարցը լուծեն: Նա անմիջապես օգնեց, միջամտեց և հարյուր տոկոսով աջակցեց, անձամբ եմ եղել նրա մոտ»:
Նշենք, որ օրերս ՀՀ քրեական գործերով վերաքննիչ դատարանը՝ դատավոր Արմեն Դանիելյանի նախագահությամբ, արդարացրեց Հայկ Մովսիսյանին:
