Ճապոնիայի հյուսիս-արևելյան Հոնսյու կղզու Սենդայ քաղաքի տաքսու վարորդները հանդիպել են իսկական ուվականների: Ինչպես գրում է Asahi թերթը, գերբնական երևույթը սկսել է տեղի ունենալ 2011 թվականի ցունամիից ու երկրաշարժից հետո:
Նշվում է, որ Տոհոկու համալսարանի հետազոտող Յուկե Կուդոն հետաքրքրվել է տաքսու անսովոր «ուղևորներով»: Նա խոսել է տաքսիստների և տեղի բնակիչների հետ` նյութեր հավաքելով դիսերտացիայի համար:
Տաքսիստներից մեկը պատմել է. «Երկրաշարժից ուղիղ մեկ տարի անց Իսինոմակի կայարանի մոտ իմ մեքենան նստեց վերարկուով մի կին և խնդրեց տանել Մինամիհամա շրջան: Ես նրան հարցրեցի, թե նա գիտի, որ այդ շրջանը գործնականորեն անբնակելի է ցունամիից հետո: Կինը դողացող ձայնով բացականչեց. «Միթե ես մահացել եմ»: Տաքսու վարորդը հետ է նայել, սակայն հետևի նստարանին ոչ ոք չի եղել:
Գրանցվել է նաև այսպիսի դեպք. երիտասարդը նստել է տաքսի և խնդրել իրեն հասցնել Հիյորիյամա լեռնային շրջանը: Սակայն, ճանապարհին նա անհայտացել է, չնայած մեքենան ոչ մի տեղ չի կանգնել:
Ինչպես նշում է հետազոտողը․ «Երբ հաճախորդը նստում է տաքսի, հաշվիչը ավտոմատ միանում է: Դա միացել է նաև այդ դեպքերում, և տաքսիստը ստիպված վճարել է իր գրպանից ուրվականներ տեղափոխելու համար»:
2011 թվականի մարտի 11-ի երկրաշարժից մահացածների պաշտոնական թիվը Ճապոնիայում ավելի քան 15 հազար մարդ է: Շուրջ 2․5 հազար մարդ համարվում են անհետ կորած:
