Մալաթիա-Սեբաստիա վարչական շրջանի ընդհանուր իրավասության դատարանում Ռոբերտ Պապոյանի նախագահությամբ սկսվեց Արտակ Առաքելյանի գործի դատավարությունը:
Անցած տարվա սեպտեմբերի 27-ին Մալաթիայի տոնավաճառում օրը ցերեկով կատարված սպանությունը մեծ աղմուկ էր բարձրացրել:
Նախկին ամուսինը տոնավաճառի տաղավարներից մեկում որսորդական դանակով բազմաթիվ հարվածներ էր հասցրել ու սպանել կնոջը:
39-ամյա Արտակ Առաքելյանին մեղադրանք է առաջադրված դիտավորյալ սպանության ու ապօրինի կերպով սառը զենք կրելու, գործադրելու համար՝ ՀՀ քրեական օրենսգրքի 104 հոդվածի 1-ին և 235 հոդվածի 4-րդ մասերով:
Մեղադրանքի ձևակերպման մեջ արձանագրված է, որ «2015 թվականի սեպտեմբերի 27-ին, ժամը 14-ի սահմաններում խանդի շարժառիթով և ամուսնական անհավատարմության պատճառով սպանելու դիտավորությամբ Արտակ Առաքելյանը իր մոտ եղած որսորդական դանակով բազմաթիվ հարվածներ է հասցրել իր նախկին կնոջ՝ Հեղինե Դ.-ի մարմնի տարբեր մասերին ու ապօրինաբար զրկել է կյանքից»:
Դատական անդրանիկ նիստը հետաձգվեց, քանի որ նոր դատախազ է ներգրավվել գործի քննությանը, նրան ժամանակ տրվեց՝ գործի նյութերին ծանոթանալու համար:
Տուժողի իրավահաջորդի ներկայացուցիչ, փաստաբան Սեդա Սաֆարյանը մեր զրույցում նշեց, որ տուժող կողմը համաձայն չէ մեղադրական եզրակացության մեջ արձանագրվածին, թե սպանությունը կատարվել է «ամուսնական անհավատարմության պատճառով»:
Նման հանգամանք գործի քննությամբ հիմնավորված չէ: Փաստաբանն ասաց, թե միայն թերի քննության արդյունքում էր հնարավոր նման պատճառաբանություն նշել մեղադրանքի ձևակերպման մեջ: Եթե կատարվեր բազմակողմանի քննություն, լիարժեք կերպով պարզաբանվեին նախկին ամուսինների փոխհարաբերությունները ինչպես համատեղ կյանքի ընթացքում, այնպես էլ բաժանումից հետո, նման ձևակերպումը տեղ չէր գտնի մեղադրանքի մեջ:
Ամբաստանյալն իր պաշտպանական տակտիկան կառուցել է նախկին կնոջը խանդելու, ամուսնական անհավատարմության վարկածի վրա, սակայն միայն ամբաստանյալի ասելով նման հանգամանքը հաստատված համարվել չի կարող:
Ս. Սաֆարյանը հայտնեց, որ ամուսնական համատեղ կյանքի ընթացքում Արտակ Առաքելյանն ու Հեղինեն միասին Թուրքիա են մեկնել՝ առևտուր անելու համար: Հեղինեն մենակ Թուրքիայում չի եղել, որ ինչ-որ թուրքի հետ կապ հաստատեր, ինչի համար կնոջը սպանությունից հետո բարձրաձայն ու մերկապարանոց մեղադրել է Արտակ Առաքելյանը…
Արտակի ու Հեղինեի համատեղ կյանքը հարուստ է եղել կոնֆլիկտներով: Դեռ 2010 թվականին Հեղինեի նկատմամբ ամուսնու կողմից գործադրված բռնության վերաբերյալ նյութեր են նախապատրաստվել ոստիկանությունում, սակայն ներկա գործի նախաքննության ժամանակ այդ նյութերը չեն ուսումնասիրվել:
Հետագայում էլ կոնֆլիկտները շարունակվել են նրանց ընտանիքում:
Հեղինեն մի քանի անգամ հեռացել է Արտակից, բայց վերջինս մշտապես նրան սպառնալիքներ տալով վերադարձրել է՝ այդպես են ասում Հեղինեի հարազատները: Հեղինեն իրական վախ է զգացել ամուսնու սպառնալիքներից, նա հարազատներին ասել է, թե ինքը «ուրիշ ելք չունի», ստիպված պետք է վերադառնա Արտակի մոտ:
Փաստաբանը այսպես ձևակերպեց Արտակի վերաբերմունքը կնոջ նկատմամբ. «Կամ ինձ հետ պիտի ապրի, կամ չպետք է ապրի»:
Փաստորեն, իրականություն է դարձել վերջինը…
Դեպքից ամիսներ առաջ, արդեն իր կարծիքով վերջնականապես հեռացած լինելով Արտակից, Հեղինեն դիմել է ոստիկանություն՝ հայտնելով, թե նախկին ամուսինն անհանգստացնում է իրեն, սպառնում է:
Արտակին ոստիկանները պարտավորեցրել էին որոշ տարածությունից ավելի Հեղինեին չմոտենալ, այլևս չանհանգստացնել:
Ըստ փաստաբանի՝ ամիսներ առաջ եթե ոստիկանությունը գործը հանձներ քննչական մարմիններին, նրանք խորացված քննություն կկատարեին ու կպարզեին՝ որքանո՞վ էին իրական Արտակի կողմից հնչեցված սպանության սպառնալիքները: Այլ կերպ ասած՝ գործին լրջորեն վերաբերվելու դեպքում հնարավոր կլիներ խուսափել ողբերգությունից, երիտասարդ կինը չէր զրկվի կյանքից:
Արտակն ու Հեղինեն երկու դեռահաս երեխաներ ունեն՝ 15 տարեկան որդի և 11 տարեկան դուստր:
Հայրը, սպանելով իր երեխաների մորը ու հետմահու և անհիմն նրան մեղադրելով անհավատարմության համար, մրոտելով նրա պատիվը՝ լուրջ հարված է հասցնում նաև իր երեխաների հոգեկան աշխարհին:
Հեղինեի սպանության պահին հենց դեպքի վայրում գտնվող, դեպքին ականատես դարձած կին վկան մեծ ցավով էր արտահայտվում Հեղինեի սպանության մասին: Վկան նշեց, որ Հեղինեն լավ վարքի տեր կին էր, դա կհաստատեն տոնավաճառից նրան բոլոր ճանաչողները:
Հեղինեն այս վկայի ընտանիքի համար նաև դերձակություն է արել՝ «մեր պարտնոն ա էղել»,- նշեց վկան:
Դեպքի պահին վկան ցանկացել է մտնել Հեղինեի տաղավար, բայց լսել է Հեղինեի «անմարդկային» գոռոցները: Հեղինեն օգնություն էր կանչում:
Վկան մոտեցել է տաղավարի մուտքին: Արտակը, ըստ վկայի, կանգնած էր թիկունքով: Նա սպիտակ մարզահագուստով էր: Նրա դիմաց Հեղինեն էր՝ կիսաընկած: Հեղինեն գոռում էր:
Վկան սկզբում դանակ չի տեսել Արտակի ձեռքին, մտածել է՝ նա ձեռքերով է հարվածում Հեղինեին: Բայց երբ մոտեցել է, տեսել է Արտակի ձեռքի որսորդական դանակը. «Դանակը կմտցներ Հեղինեի մարմնի մեջ ու կհաներ… Արունը ֆանտանի պես չռռար կը»:
Այս տեսարանից ահաբեկված կինը հետ է քաշվել:
Բայց այդ պահին, ըստ վկայի, դեռ հնարավոր էր Արտակին վախեցնել ու հեռու քշել: Տաղավարի մոտ տղամարդիկ կային հավաքված, սակայն բոլորը վախեցած էին, ոչ ոք չի համարձակվել մոտենալ ու միջամտել: «Մի տաբուրետկով, բանով խփեին, մի կողմ քցեին, կարողա Հեղինեն փրկվեր»,- ասաց վկան:
Եվ Արտակը շարունակել է օրը ցերեկով, հավաքվածների աչքի առաջ որսորդական դանակով հարվածներ հասցնել իր զոհին, վերջում էլ, ըստ վկայի, կտրել է նրա կոկորդը. «Հետո էլ իրա վեննեքը փրթեց ու դանակը մի կողմ շպրտեց, ինքը կանգնեց անկյունի վրա…»:
Վկան ասաց, թե ինքը մոտեցել է արնաթաթախ Արտակին ու ամոթանք է տվել, ասել է՝ դու նրան կյա՞նք էիր տվել, որ խլեցիր…
Դատահոգեբանական փորձաքննության եզրակացությամբ՝ Արտակ Առաքելյանը հանցանքի կատարման պահին ֆիզիոլոգիական աֆեկտի վիճակում չի եղել: Իսկ թե «թուրքի հետ» իրեն դավաճանելու համար նախկին կնոջը սպանելու՝ ամբաստանյալի անհոգի պատճառաբանությունը ինչքանով կհիմնավորվի, ցույց կտա գործի դատական քննությունը:
Դատական հաջորդ նիստը տեղի կունենա փետրվարի 12-ին:
