Թուրքիան առաջին անգամ կարող է պատասխանել Անկարայի նկատմամբ 2015թ. նոյեմբերին սահմանված ռուսական պատժամիջոցներին: «Կոմերսանտ»-ի հաղորդմամբ՝ սահմանափակող միջոցառումները կվերաբերեն մետալուրգիայի ոլորտին:
«Որևէ պաշտպանական միջոցառում ռուսական արտադրանքի նկատմամբ, բացի մետաղի գլանվածքից, առայժմ չի ենթադրվում»,- նշել է թերթի՝ Ռուսաստանի և Թուրքիայի առևտրային բանակցություններին իրազեկ աղբյուրը:
Թուրքիա տաք գլանվածքի ներկրման ոլորտում Թուրքիայի էկոնոմիկայի նախարարության կատարած հակադեմպինգային հետաքննության արդյունքները ցույց են տվել, որ ռուս մետալուրգները մինչև 13,66% դեմպինգային մարժա են ստացել: Պարբերականի տեղեկությամբ՝ զեկույցի հիման վրա փետրվարին Անկարան որոշում կընդունի արտահանողների համար հակադեմպինգային տուրքերի չափի մասին, որոնք, որպես կանոն, լիովին համապատասխանում են հաշվարկված դեմպինգային մարժայի չափին:
Մոսկվայի և Անկարայի հարաբերությունները սրվել են, երբ 2015թ. նոյեմբերի 24-ին Թուրքիայի ռազմաօդային ուժերը Սիրիայի տարածքում խփեցին ռուսական «Սու-24» ռմբակոծիչը:
ՌԴ կառավարության որոշմամբ՝ 2016թ. հունվարի 1-ից արգելվել է Թուրքիայից բանջարեղենի և մրգերի, ծաղիկների, թռչնամսի, աղի ներկրումը Ռուսաստան: Արգելվել են Ռուսաստանի և Թուրքիայի միջև չարտերային օդային փոխադրումները, չեղարկվել է առանց այցագրի ռեժիմը: Ռուսական ընկերություններին արգելվել է Թուրքիայի քաղաքացի աշխատող վարձել:
