Ծաղկաձորում ընթացող դահուկասահքի Զարգացող ֆեդերացիաների անդրանիկ գավաթի խաղարկությունն ավարտվել է: Հայաստանի դահուկային սպորտի ֆեդերացիայի գլխավոր քարտուղար Գագիկ Սարգսյանն ամփոոփել է խաղարկությունը և խոսել ձեռքբերումների մասին:
«Ինձ համար լավ գնահատականը մի քանի բաղկացուցիչ ունի: Եթե լավ, ուրեմն լավ: Այն գերազանց ստացվեց մեզ համար, քանի որ Հայաստանի թիմը դարձավ գավաթակիր: Բնական է, որ մեզ համար դա գերազանց արդյունք է: Միջազգային ֆեդերացիայի ներկայացուցիչները և մասնավորապես Զարգացող դահուկային ֆեդերացիաների խորհրդի նախագահն աշխատանքը պարզապես անթերի գնահատեց: Նա սկսել է այլ երկրների համար հենց Հայաստանի օրինակը բերել: Գավաթի առաջին խաղարկությունում մենք պատվով կատարեցինք մեր առջև դրված խնդիրները:
Երբ ինձ հարցրին, թե որքան ժամանակ ենք նախապատրաստվել այս առաջնությանը, ես ասացի, որ մոտ մեկ տարի: Բայց իրականում մենք այս ամենին նախապատրաստվել ենք ոչ թե մեկ, այլ երկար տարիներ: Ինքներս սկսել ենք ամենափոքր մրցաշարից, բայց այսօր անցկացնում ենք նման խոշոր մրցաշար: Սա տարիների քրտնաջան աշխատանքի արդյունք է: Տա Աստված՝ մենք Հայաստանում տեսնենք ավելի խոշոր մրցաշարեր:
Մենք երբևէ չէինք էլ կարող երազել, որ Հայաստանում կունենանք մրցաշար, և լավագույն վարկանիշային միավորը կլինի 31-ը: Եվ մրցումային առաջին օրը մենք ունեցել ենք 31 միավոր՝ դահուկասահքի խոշոր մրցաշարերում նման արդյունքներ չեն գրանցվում»,- ՀԱՕԿ լրատվականի հետ զրույցում ասել է Գագիկ Սարգսյանը:
ՀԱՕԿ լրատվության բաժին
