Լրագրող և հեռուստահաղորդավար Քսենյա Սոբչակի տելեգրամյան ալիքը կոտրելու մասին հայտարարած հաքերները հրապարակել են նյութեր, որոնք ներկայացնում են որպես նրա նամակագրությունների սքրինշոթներ՝ պաշտոնյաների և իր աշխատակիցների հետ։ Սոբչակը չի հերքել, որ ենթարկվել է հաքերային հարձակման, սակայն հայտարարել է, որ իր նամակագրությունների անվան տակ տարածվող հրապարակումները կեղծ են։
Միևնույն ժամանակ, հեռուստահաղորդավար Վլադիմիր Սոլովյովը Սոբչակին և նրա մորը՝ սենատոր Լյուդմիլա Նարուսովային, մեղադրել է Ռուսաստանի ղեկավարության դեմ «դավադրության» մեջ։ Ի պատասխան՝ Սոբչակը BBC-ին ասել է, որ դաշնային հեռուստաալիքները փորձում են իրեն ներկայացնել որպես «պետական դավաճանություն կատարած անձ»։
Սոբչակի խոսքով՝ հուլիսի 8-ին հաքերները կոտրել են իր էլեկտրոնային փոստը և որոշ ժամանակով վերահսկողություն ստացել իր տելեգրամյան ալիքների նկատմամբ։ Դրանից հետո նրա «Սոբչակ» և «Արյունոտ տիրուհի» ալիքներում հրապարակումներ են հայտնվել, որոնք ներկայացվել են իբր իր անունից։ Դրանցում նշվում էր, որ «հաքերային խումբը» հասանելիություն է ստացել նրա անձնական նամակագրությանը։ Հրապարակումների հետ միասին տարածվել էին նաև սքրինշոթներ և տեսանյութեր, որոնք, ըստ հեղինակների, ներկայացնում էին Սոբչակի հաղորդագրությունները տարբեր զրուցակիցների հետ։
