Ադրբեջանական APA լրատվական գործակալության փոխանցմամբ, մեսխեթցի թուրքերը (ախալցխյան թուրքեր) կարող են Վրաստան վերադառնալ արդեն այս տարի: Այս մասին հայտարարել է թուրք մեսխեթցիների Vatan («Հայրենիք») միության խորհրդի ղեկավար Շամսադին Սյարվարովը:
Վերջինիս խոսքերով, ԵԽ-ի առջև թուրք-մեսխեթցիների վերաբերյալ պաշտոնական Թբիլիսիի ստանձնած պարտավորությունների ժամկետն ավարտվում է այս տարի. «Սակայն այդ ժամկետը կարող է երկարաձգվել: Ներկայումս հանձնաժողովը համապատասխան աշխատանքներ է իրականացնում և առաջիկա օրերին նիստ կգումարի: Մենք հուսով ենք, որ շուտով կհայտնվենք այն տարածքում, որտեղից հարկադրաբար հեռացել ենք 67 տարի առաջ:
Թուրք-մեսխեթցիների վերադարձը տեղի է ունենալու մի քանի փուլով: Դրանք իրենց մեջ ներառում են վերաբնակեցմանն առնչվող որոշման ընդունումն ու հայտ ներկայացնելը, վերաբնակի կարգավիճակ ստանալը և այլն: Այժմ այս ամենը քննարկվում է վրացական կողմի հետ»:
Հիշեցնենք, որ 1944 թվականին Ստալինի հրամանով անհուսալի տարր հանդիսացող թուրք-մեսխեթցիները բռնագաղթվեցին Վրաստանի հարավարևելյան հատվածից և հաստատվեցին Ղազախստանում, Ղրղզստանում ու Ուզբեկստանում:
Երբ 1999 թվականի ապրիլի 27-ին Վրաստանը դարձավ ԵԽ-ի 41-րդ անդամ, հենց Թուրքիայի նախաձեռնությամբ ու ԱՄՆ-ի անմիջական աջակցությամբ պարտավորվեց ստանձնել թուրք-մեսխեթցիների վերադարձման ապահովումը:
Այժմ պլանավորված է 2011-2013 թվականներին կենսագործել «Դյոնուշ» («Վերադարձ») պլանը և Ջավախքում վերաբնակեցնել թուրք-մեսխեթցիների 6000 ընտանիքների: Թուրքիան ակտիվորեն սատարում է այդ ամենը:
