Աշխատանքային այցով Չեխիայի Հանրապետությունում գտնվող ՀՀ ԱԺ փոխնախագահ, Հայաստան-Չեխիա պատգամավորական բարեկամության խմբի ղեկավար Էդուարդ Շարմազանովը հունվարի 18-ին հանդիպում է ունեցել Չեխիայի Կաթոլիկ եկեղեցու առաջնորդ, Պրահայի արքեպիսկոպոս Կարդինալ Դոմինիկ Դուկայի հետ:
Ինչպես տեղեկացրին Էդուարդ Շարմազանովի աշխատակազմից, ՀՀ ԱԺ փոխնախագահը բարձր է գնահատել Պրահայի արքեպիսկոպոսի անձնական ներդրումը երկու քրիստոնյա ժողովուրդների հարաբերությունների ամրապնդման գործում: Էդուարդ Շարմազանովն իր երախտագիտությունն է հայտնել Կարդինալ Դոմինիկ Դուկային` Պրահայում Հայոց ցեղասպանության 100-րդ տարելիցին նվիրված ցուցահանդեսին մասնակցելու համար:
ԱԺ փոխնախագահը գոհունակությամբ արձանագրել է, որ անցյալ տարի Պրահայի «Սուրբ Հոգի» կաթոլիկ եկեղեցին անժամկետ օգտագործման համար փոխանցվել է Հայ առաքելական եկեղեցու Սուրբ Գրիգոր Լուսավորիչ ծխական համայնքին:
Կարդինալ Դոմինիկ Դուկան իր հերթին նշել է, որ տպավորված է անցյալ տարի Հայաստան կատարած իր այցով: Պրահայի արքեպիսկոպոսը կարևորել է աշխարհում առաջինը քրիստոնեությունը որպես պետական կրոն ընդունած երկրի հետ հարաբերությունների խորացումը:
Հանդիպմանը կողմերն իրենց մտահոգությունն են հայտնել մեր օրերում քրիստոնյաների բնաջնջման և մշակութային ցեղասպանության կապակցությամբ՝ նշելով, որ այսօր Մերձավոր Արևելքի քրիստոնյաները կանգնած են բնաջնջման նույնպիսի վտանգի առջև, ինչպես 100 տարի առաջ Թուրքիայում: Կարդինալ Դոմինիկ Դուկան ևս մեկ անգամ դատապարտել է հայկական քրիստոնեական հուշարձանների ոչնչացումը: Էդուարդ Շարմազանովը Չեխիայի Կաթոլիկ եկեղեցու առաջնորդին նվիրել է Գրիգոր Նարեկացու «Մատյան ողբերգության» պոեմը:
