Ռուսական RIA Novosti լրատվական գործակալության փոխանցմամբ՝ Վրաստանում գրանցվել է այս տարի H1N1 գրիպի (խոզի գրիպ) վիրուսից առաջին մահաբեր դեպքը։ Այդ մասին հայտարարել է Վրաստանի հասարակական առողջության ու հիվանդությունների վերահսկողության ազգային կենտրոնի ղեկավարի տեղակալ Պաատա Իմնաձեն:
«Նախորդ շաբաթ գրանցվել է մեկ մահաբեր դեպք, հիվանդը եղել է Արևմտյան Վրաստանից, նա մահացել է Թբիլիսիում հոսպիտալացվելուց հետո։ Ներկա պահին 100.000 բնակչին բաժին է ընկնում այդ հիվանդության 240 դեպք։ Նրանց թվում թեև շատ հազվադեպ, սակայն կան նաև ծանր դեպքեր»։
Նրա խոսքով՝ փետրվարին ակնկալվում է հիվանդների քանակի մեծացում, սակայն համաճարակի համար անհրաժեշտ է, որ 100.000 բնակչին բաժին ընկնի այդ հիվանդության 500 դեպք։ Վրաստանում խոզի գրիպով հիվանդանալու դեպքեր գրանցվում են ամեն տարի։ Խոզի գրիպի զոհերի առավելագույն ցուցանիշը գրանցվել է 2013 թվականին, երբ այդ վիրուսից մահացավ 26 մարդ։
