Կիրակի Չեխիայի Ժդիար քաղաքի շրջանում՝ Լեհաստանի հետ սահմանից ոչ հեռու երկու որսորդների վրա արջ է հարձակվել: Տղամարդկանցից մեկը բազմաթիվ պատռվածքային վնասվածքներ է ստացել, առկա են նաև ոսկրային կոտրվածքներ: Երկրորդ որսորդը, փորձելով փրկել ընկերոջը, երկու անգամ կրակել է կենդանու վրա, սակայն վերջինս կարողացել է փախչել, հայտնում է ITAR-TASS-ը:
Տուժածը տեղափոխվել է մոտակա հիվանդանոց, նրա վիճակը բժիշկները գնահատում են որպես ծանր:
Արջի որոնման աշխատանքներին ուղարկվել են որսորդներ, որոնք արջին հայտնաբերելու ժամանակ կենդանուն պետք է գնդակահարեն, քանի որ վիրավոր արջերը դառնում են մահացու վտանգավոր մարդկանց համար ու հարձակվում են առանց որևէ պատճառի:
Չեխիայում արջերը գտնվում են խիստ պաշտպանության տակ: Նրանց վրա կրակել թույլատրվում է միայն մարդու վրա հարձակման դեպքում:
