Իրանի պետական հեռուստատեսությունը տեսանյութ է ցուցադրել կալանավորված ամերիկացի զինվորական ծովագնացներից մեկի մասնակցությամբ, որում նա ներողություն է խնդրում Իրանի տարածքային ջրեր ԱՄՆ ռազմածովային ուժերի նավակների պատահական մուտքի համար:
Տեսանյութում ծովագնացն անգլերեն արտաբերում է «դա թյուրիմացություն էր» արտահայտությունը, որը հեռուստատեսությունը ֆարսի լեզվով թարգմանել է որպես «դա սխալ էր»:
Զինվորականը, որին իրանական հեռուստատեսությունը ներկայացրել է որպես կալանավորված ծովագնացների հրամանատար, ասում է, որ նավակների նավիգացիոն համակարգը ցույց է տվել, որ դրանք իրանական ջրերում են:
ԱՄՆ Պետդեպի պաշտոնական ներկայացուցիչ Մարկ Թոները հաստատել է տեսագրության գոյության փաստը, սակայն չի կարողացել հավաստիացնել դրա իսկությունը՝ խոստանալով դա ավելի ուշ անել: Նա նաև նշել է, որ Վաշինգտոնը տվյալներ չունի այն մասին, որ կալանավորված նավաստիների հետ վատ են վարվել: «Ինչպես մենք հասկանում ենք՝ նրանց տրամադրել են ծածկոցներ, գիշերելու տեղ և սննդամթերք»,- մեջբերում է Թոների խոսքերը RIA Novosti-ն:
Հունվարի 12-ին ԱՄՆ ռազմածովային ուժերի երկու նավեր և դրանց անձնակազմի անդամները Իրանի կողմից կալանավորվել են Ֆարսի կղզու շրջակայքում՝ Իրանի ջրային տարածքում:
Դեպքը հարուցել է Թեհրանի սուր քննադատությունը: Այսպես, Իրանի ԱԳՆ ղեկավար Մոհամմադ Ջավադ Զարիֆն ԱՄՆ իշխանություններից պահանջել է պաշտոնապես ներողություն խնդրել: Իրանի զինված ուժերի հրամանատար, գեներալ-մայոր Հասան Ֆիրուզաբադին նավերի կալանավորումն անվանել է լավ դաս ամերիկացի կոնգրեսականների համար, որոնք օնդում են Իրանի դեմ նոր պատժամիջոցներ սահմանելու հարցում:
Հունվարի 13-ին իրանական իշխանություններն ազատ են արձակել բոլոր կալանավորված նավաստիներին: Արդյոք ԱՄՆ-ին կվերադարձվե՞ն կալանավորված նավերը՝ առայժմ չի հաղորդվում:
