«Համաշխարհային բանկի վարկային 1 և 2-րդ ծրագիրը ամբողջությամբ ուղղված էր գյուղական առողջապահության ոլորտի բարեփոխմանը, որը քաղաքայինից բավականին հետ էր մնում: Արդյունքում` այսօր գյուղական համայնքներում մենք ունենք ընտանեկան բժշկության կայացած ինստիտուտներ: Ավելին` ներկա պահին աշխատանքներ են տարվում քաղաքային ընտանեկան ինստիտուտի կայացման ուղղությամբ»:
Այս մասին այսօր մեզ հետ զրույցում նշեց Առողջապահության նախարարության առաջնային բուժօգնության բաժնի պետ Ռուզաննա Յուզբաշյանը:
Նրա խոսքերով, հանրապետության երկու երրորդը գյուղական բնակավայրեր են կամ գյուղական փոքրիկ քաղաքներ, որոնց բնակչությունը որակյալ բուժօգնության կարիք ունի: «Այդ ուղղությամբ համաշխարհային բանկի ծրագիրն ամբողջությամբ ուղղվել է գյուղական բնակավայրերին: Հիմա գյուղական բնակավայրերում աշխատում են ընտանեկան բժիշկներ: Եթե նախկինում գործում էին նախկին մանկաբույժներ կամ նախկին թերապևտներ, և նման պայմաններում բնակչի առաջնային բուժօգնություն ստանալու համար կարևոր չէր, թե գյուղի միակ բժիշկը մեծերի մասնագետ է, թե երեխաների, ապա հիմա նախկին մանկաբույժին և թերապևտներին ուսուցանել ենք նաև այլ գիտելիքներ և հմտություններ, որը նախկինում չունեին: Նրանք հիմա անցել են անվճար վերապատրաստում և վերազինվել նոր սարքավորումներով»,- մանրամասնեց Ռուզաննա Յուզբաշյանը:
