Մեքսիկական իշխանությունները լրջորեն խստացրել են թմրաբարոն Հոակին Գուսմանի՝ «Էլ Չապոյի» հսկողության ռեժիմը։ Նրան հաջողվել էր ձերբակալել երկրորդ փախուստից կես տարի անց։ Այս մասին հայտնում է Reuters գործակալությունը։
«Սինալոա» կարտելի պարագլուխն այժմ պահվում է բանտի մյուս հատվածում, նրա մեկուսի խցի դռների մոտ սահմանվել է հսկողության շուրջօրյա ռեժիմ։ Ամրացվել է նաև խցի հատակը, քանի որ անցած ամռանը նրան հաջողվել էր փախչել թունելով։
Նրա խուցը զինվել է հավելյալ ցուցիչներով ու տեսահսկման խցիկներով։ Բանտի պատերից այն կողմ կանգնած են զրահապատ մեքենաներն ու թեթև տանկերը։
Բանտ են արդեն այցելել անվտանգության ուժերի բարձրաստիճան պաշտոնյաները, ովքեր ընդգծել են, որ այժմ հանցագործի հսկողությունը համապատասխանում է միջազգային չափորոշիչներին։
