Ադրբեջանական Apa լրատվական գործակալության փոխանցմամբ, Ադրբեջանում ԱՄՆ դեսպան Մեթյու Բրայզան լրագրողներին տված հարցազրույցի ժամանակ անդրադարձ է կատարել Լեռնային Ղարաբաղի հակամարտության կարգավորմանը.
«Ես զգում եմ, որ որոշակի առաջընթաց է գրանցվել ղարաբաղյան հակամարտության կարգավորման հարցում: Սպասվում է, որ ամռանը կայանալու է Հայաստանի ու Ադրբեջանի նախագահների հանդիպումը: Եթե դա տեղի ունենա, ապա մինչ այդ կկայանա արտգործնախարարների հանդիպումը, ուր և լուծում կստանան մնացյալ հարցերը:
Այժմ ես չեմ հանդիսանում ԵԱՀԿ Մինսկի խմբի համանախագահ, և չեմ տիրապետում նախագահների հանդիպման ժամկետի մասին կոնկրետ տեղեկատվության»:
Հիշեցնենք, որ առավել վաղ ԵԱՀԿ Մինսկի խմբի ռուս համանախագահ Իգոր Պոպովը հայտնել էր, որ ամռանը կայանալու է Հայաստանի, Ադրբեջանի ու Ռուսաստանի նախագահների հանդիպումը, ուր քննարկվելու է ղարաբաղյան հակամարտության կարգավորման խնդիրը:
