Ստամբուլի հայկական «Ակօս» թերթի փոխանցմամբ՝ Հրանտ Դինքի ընտանիքի փաստաբանները բողոքարկել են 24 պետծառայողի նկատմամբ քրեական հետապնդումը դադարեցնելու մասին որոշումը, որոնց կասկածում էին ծառայողական անփութության ու լիազորությունների չարաշահման մեջ։ Այս մասին հայտարարել է փաստաբաններից Հաքան Բաքըրջօղլուն։
24 կասկածյալների թվում եղել են Դինքի սպանության ժամանակ Ազգային հետախուզական կազմակերպության (MIT) Ստամբուլի շրջանի փոխնախագահ Օզել Յըլմազը, Ստամբուլի փոխնահանգապետ Էրգոն Գյունգորը, ինչպես նաև Վելի Քյուչուքն ու Քեմալ Քերինչսիզը։
Դինքի փաստաբանները 24 կասկածյալների նկատմամբ քրեական հետապնդման դադարեցման մասին 2015 թվականի դեկտեմբերի 19-ին կայացված որոշման կապակցությամբ իրենց բողոքարկումը ներկայացրել են Ստամբուլի հանրապետական դատախազություն։
Ավելի վաղ հաղորդվել էր, որ Թուրքիայում կրկին օրակարգում են հայտնվել Դինքի սպանության վայրում գտնվող տեսախցիկների տեսագրությունները, քանի որ հավանական է, որ տեսագրություններում հայտնված մարդկանցից մի քանիսը ժանդարմերիայի ներկայացուցիչներ են։
