Մեծ Բրիտանիայի արքայազն Ուիլյամը պատմել է, թե ինչպես է հայրությունն իրեն «ավելի հուզական» դարձրել և օգնել գիտակցել՝ որքան արժեքավոր է կյանքը: Այս մասին հայտնում է BBC-ի ռուսական ծառայությունը:
Արքայազն Ջորջի և արքայադուստր Շառլոտայի ծնվելու հետ 33-ամյա Ուիլյամը, իր խոսքով, սկսել է ավելի սուր արձագանքել աշխարհում կատարվող իրադարձություններին, նաև մտածել, թե դա նշանակում է չտեսնել, թե ինչպես են մեծանում երեխաներդ:
Prince’s Trust բարեգործական կազմակերպությանը նվիրված փաստագրական ֆիլմում արքայազն Ուիլյամը խոստովանել է, որ «ամենաաննշան բաները» հիմա իրեն զգացմունքներով են լցնում:
Արքայազն Չարլզը հուսով է, որ ապագայում իր որդիները կղեկավարեն այդ բարեգործական հիմնադրամը:
Արքայազններ Ուիլյամի և Հարրիի հետ զրուցել են բրիտանացի հայտնի հաղորդավարներ Էնթոնի Մաքփարթլինը և Դեքլան Դոննելլին:
«Ես երբեք առանձնապես չեմ նյարդայնացել կամ չափազանց մտահոգվել նրա պատճառով, ինչ տեղի է ունենում շուրջս: Սակայն հիմա, թվում է, նույնիսկ ամենաաննշան բաներն ինձ շատ ավելի ուժեղ են հուզում: Որպես հայր՝ դու սկսում ես բոլորովին այլ կերպ ընկալել ամենը, ինչ կատարվում է քո շուրջը և ամբողջ աշխարհում,- ասել է նրանց արքայազն Ուիլյամը:- Երևի դա տեղի է ունենում, որովհետև դու գիտակցում ես, թե ինչ թանկ է կյանքը, դրան բոլորովին այլ կերպ ես նայում: Օրինակ՝ սկսում ես մտահոգվել, թե ինչ է նշանակում չտեսնելը, թե ինչպես են մեծանում երեխաներդ»:
Արքայազն Հարրին պատմել է, որ հայրն ամբողջ կյանքում եղել է լավագույն խորհրդատուն իր և Ուիլյամի համար, թեև երբեմն իրենց անհարմար վիճակի մեջ է դրել:
Արքայազն Ուիլյամը հիշել է, թե ինչպես է դպրոցական տարիներին պատմողի դեր խաղացել ամանորյա բեմադրությունում: Հանդիսատեսի շարքերում Ուելսի արքայազնը չի կարողացել զսպել ծիծաղը, երբ հրավառությունը ոչ ժամանակին է աշխատել:
«Մնացած ամբողջ պիեսի ընթացքում նա շարունակեց ծիծաղել՝ չնայած իմ խիստ հայացքներին: Մի քանի անգամ ես նույնիսկ դադար տվեցի և նրա վրա արտահայտիչ հայացքներ նետեցի, հետո նորից սկսեցի կարդալ տեքստս: Ընդհանուր առմամբ, դա սարսափելի էր»,- հիշում է արքայազն Ուիլյամը:
