Այսօր աշխարհը շատ բուռն, բազմաշերտ և շատ արագ է զարգանում, շատ արագ են տեղի ունենում քաղաքական զարգացումները, կարծում եմ ՝ հաջորդ տարիներին այդ արագությունը շարունակվելու է ավելի մեծանալ: Քաղաքական համակարգը, ինստիտուտները, գործիչները պարտավոր են առաջիկայում ուժերի գերլարումով ավելի արագ և ավելի համարժեք հետևել զարգացումներին և նաև արձագանքել՝ ըստ անհրաժեշտության:
2015-ը մեզ համար ուներ շատ կարևոր մի խուրհուրդ. դա Հայոց ցեղասպանության 100-ամյա տարելիցի խորհուրդն էր, հայ ժողովրդի ձայնը դարձավ հնարավորինս լայն աշխարհի համար լսելի, հասկանալի, ընդունելի, և նաև շատ պետություններ ու պատվիրակություններ ամենատարբեր մակարդակներով արձագանքեցին:
2015-ը որպես տարածաշրջանների լարվածության, նոր սպառնալիքների և նոր հիմնախնդիրների առաջացման տարի պետք է գնահատել, անվտանգության գործոնը դառնում է կարևորագույն խնդիր:
2015-ը տնտեսական խնդիրների հարուցման ժամանակ էր, ինչը մեզ բոլորիս, ստիպում է ապագայի համար ունենալ ավելի ճկուն մեխանիզմներ, ավելի արագ փոփոխություններին և նոր ստեղծվող իրավիճակներին գործնականում պատրաստ լինելու, դրանից օգուտ վերցնելու կամ հնարավոր հիմնախնդիրներից խուսափելու համար:
2015-ը մեզ համար կարևորվեց նաև խաղաղության պահպանման՝ և՛ Հայաստանի, և՛ հայ ժողովրդի անվտանգության պահպանման առումով, և փառք ու պատիվ մեր զինված ուժերին, որոնք կարողացան անխոցելի պահել Հայաստանի Հանրապետության սահմանները, և փառք ու պատիվ ԼՂՀ պաշտպանության բանակին, որ կարողացավ նման կերպ անխոցելի պահել ԼՂՀ սահմանները:
2015-ը կարևոր էր մեզ համար նաև որպես առաջին տարի ԵՏՄ լիիրավ անդամակցության և ինտեգրացիոն գործընթացներին ակտիվ մասնակցության համար: 2015-ը կարևոր էր, որ ԵՄ հետ մենք գտանք երկխոսությունը շարունակելու, գործընթացը ընդլայնելու և համապարփակ ձևով հարաբերությունները շարունակելու փոխադարձ կամք և համապատասխան ընկալում. մենք արդեն ունենք սկսված բանակցային ձևաչափ:
2015-ը կարևոր էր ներպետական, ներքաղաքական կայուն զարգացումնեի համար, որը մեզ շատ անհրաժեշտ է, որպեսզի մենք կարողանանք մեր արտաքին քաղաքական խնդիրներում սխալներ չանել և համաչափ քաղաքական, ռազմական և անհրաժեշտ նաև կապիտալ և աջակցություն ունենալ:
2015-ը կարևոր է հասկանալու համար հաջորդ տարիներին մեզ սպասվող խնդիրները, որոնք որ մենք պետք է լուծենք, և հուսանք, որ 2016-ի համար մենք արդեն ունենք բավարար քաղաքական հիմքեր՝ հաշվի առնելով սահմանադրական բարեփոխումների արդեն կայացման փաստը և մեր ժողովրդի կողմից նոր սահմանադրության հաստատման միասնական կամքը: Մենք պետք է կարողանանք 2016-ին և հաջորդ տարիներին նոր մեխանիզմներով դիմագրավել բոլոր տեսակի սպառնալիքները, իսկ սպառնալիքներն այսօր աշխարհում ավելի շատ են, քան հնարավորությունները, բայց քաղաքականության ամբողջ հմայքը և հաջողությունն այն է, որ բոլոր իրավիճակներում պետք է գտնել հնարավորը: Քաղաքականությունը հնարավորի արվեստ է, ես վստահ եմ, որ մեր ժողովրդին դա հաջողվելու է: Առավել ևս այս պետության, պետականության պարագայում մենք շատ ավելի արագ և գործուն մեխանիզմներով կարողանալու ենք հաղթահարել բոլոր ստեղծված իրավիճակները, կարողանալու ենք ունենալ դրական հույսեր ու ակնկալիքներ՝ ճիշտ և հետևողական աշխատանքի արդյունքում նաև բարօրության ավելացման և գոյություն ունեցող ներքին սոցիալական, տնտեսական խնդիրների արագ լուծման հարցում:
