Երևանի ավագանու ընտրություններում ՀԱԿ-ը, ԲՀԿ-ն ու ՀՅԴ-ն հայտարարել են, որ ընտրության օրը համատեղ են հետևելու ընտրությունների ընթացքին` բացառելու համար ընտրախախտումները և տեր կանգնելու ձայներին: Ակնհայտ է նաև, որ մոտ 10 տարի ՀՀԿ-ի հետ կոալիցիայի մեջ եղած ԲՀԿ-ն նախընտրական շրջանում խիստ ընդդիմադիր ելույթներ է ունենում` փորձելով ընդդիմություն ներկայանալ և տիրանալ իր գործընկերների` նույն ընդդիմության ձայներին: Այս հարցերի շուրջ է «Առաջին լրատվական»-ի զրույցը ԱԺ ՀԱԿ խմբակցության պատգամավոր Լյուդմիլա Սարգսյանի հետ:
– Տիկին Սարգսյան, որպես ՀԱԿ ներկայացուցիչ` ինչպե՞ս եք գնահատում, որ նախընտրական շրջանում ԲՀԿ-ն որպես ընդդիմություն է ներկայանում` փորձելով տեր կանգնել նաև ընդդիմադիր ձայներին:
– Ես երբևիցե չեմ լսել, որ իրենք իրենց ընդդիմություն անվանած լինեն: Համենայնդեպս` այլընտրանք են իրենք իրենց անվանում: Իսկ եթե որևէ քաղաքական ուժ ուզում է դառնալ ընդդիմություն, դա իր իրավունքն է: Եվ եթե մենք դրա ականատեսը կլինենք, ուրեմն միայն ուրախ կլինեմ:
– Խոսքն այն մասին է, որ միայն նախընտրական շրջանում ընդդիմադիր ելույթներ ունենալով` ԲՀԿ-ն փորձում է ընդդիմադիր ձայներին տեր կանգնել:
– Փորձում եմ օբյեկտիվ լինել: ԱԺ-ում էլ ԲՀԿ-ի կողմից բազմաթիվ ընդդիմադիր ելույթներ եմ լսել: Նախ ասեմ, որ անկախ` ԲՀԿ-ն ընդդիմադիր է խոսում, թե չէ, ԲՀԿ-ն էլ` որպես քաղաքական ուժ, շատ լավ հասկանում է, որ ժողովրդի մեջ մեծ դժգոհություն է կուտակվել իշխանությունների նկատմամբ: Բա ինչ անի, որպես իշխանություն հանդես գա՞, երբ իշխանության մաս չի կազմում հիմա: Բնական է, որ էդպես պետք է անի:
– ԲՀԿ-ն մոտ 10 տարի կոալիցիայում է եղել, իշխանության մեջ է եղել, չե՞ք կարծում, որ պատասխանատու է Հայաստանում կատարվածի համար:
– Ոչ ոք ոչ մեկին պատասխանատվությունից չի ազատում, բայց եթե քաղաքական ուժը ինչ-որ մի պահի տեսնում է, որ էսպես շարունակել չի կարող, ես ցանկանում եմ համենայնդեպս էդպես մտածել, և պետք է ժողովրդի շահերով առաջնորդվի, «կարտի յեմու վ ռուկի», ավելի լավ, եթե էդպես է մտածում:
– Չե՞ք կարծում, որ հենց ՀԱԿ-ի, «Ժառանգության» ձայներին է փորձում տիրանալ:
– Չեմ կարծում, մենք շատ կայուն ընտրազանգված ունենք, և կարծում եմ, որ էս դեպքում ԲՀԿ-ն բավական մեծ հնարավորություններ ունի: Եթե կհավաքի շատ ձայն, և ՀԱԿ-ը նույնպես ՀՅԴ-ի ու «Ժառանգության» հետ կունենան բավականաչափ ձայն, որ կարող են կոալիցիա ստեղծել ԲՀԿ-ի հետ, ես կարծում եմ` դա լավագույն տարբերակն է Երևանում իշխանությունը ՀՀԿ-ից վերցնելու համար:
– Իսկ Դուք մեծ տարբերություն տեսնո՞ւմ եք ԲՀԿ-ի և ՀՀԿ-ի միջև:
– Ժամանակը ցույց կտա, էսօր չեմ կարող ասել:
– Տիկին Սարգսյան, տեղեկություններ կան, որ ըստ իշխանական սցենարի` Երևանի ավագանու ընտրություններում ՀԱԿ-ն ու Դաշնակցությունը չեն հաղթահարելու անցողիկ շեմը…:
– Հետաքրքիր է, էդ տեղեկությունները իշխանություններին որտեղից, եթե քաղաքացին դեռ ընտրություն չի կատարել: Ուրեմն դա իրենց ցանկությունն է, բայց չեմ կարծում, որ միշտ կարող են իրենց ցանկությունն ի կատար ածել: Դա իրենց ցանկությունն է և ոչ թե իրականություն: Եվ վերջին հաշվով, նման տեղեկություն որտեղից կարող է լինել: Այ, եթե ընտրություններն ավարտված լինեին և նախնական թվերն արդեն հրապարակված, նման տեղեկության մասին կարելի էր խոսել: Եթե նման լուրեր են տարածում, ուրեմն դա իրենց ծրագիրն է, որը փորձելու են իրականացնել, բայց ինձ թվում է` Երևանում դժվար կլինի:
– ՀԱԿ-ի վերջին հանրահավաքում մարդկանց քանակը ինչպե՞ս եք գնահատում:
– Շատ նորմալ եմ գնահատում: Ես չեմ կարծում, որ լիներ քաղաքական ուժ, որ կարողանար էդ չափով մարդ հավաքեր: Սա ավագանու ընտրություններ են, համապետական չեն, և մարզերից ես մարդ չտեսա: Դա Երևանի ՀԱԿ անդամներն էին, համակիրներն էին, շարքային քաղաքացիներն էին: Բավականին դրական եմ գնահատում: Հետո մի մոռացեք` մի մասը նստում է սրճարաններում, լսում է էնտեղից, Լևոն Տեր-Պետրոսյանի ելույթի ժամանակ է մոտենում: Մի խոսքով` դրական եմ համարում:
