2011 թ. մայիսի 2-ին, պաշտոնական տեղեկատվության համաձայն, Պակիստանի Աբոթաբադ քաղաքում ԱՄՆ ռազմածովային ուժերի հատուկ նշանակության ստորաբաժնումները սպանել են «Ալ-Քաիդա» ահաբեկչական կազմակերպության առաջնորդ Ուսաման բեն Լադենին: Ինչպես հաղորդում է Korrespondent-ը, 2011 թ. մայիսի 1-ի լույս մայիսի 2-ի գիշերը նման հայտարարությամբ հանդես եկավ ԱՄՆ նախագահ Բարաք Օբաման:
Համար մեկ ահաբեկչի աճյունը «հուղարկավորված» է Արաբական ծովում: Սպիտակ տունը որոշեց հանրությանը չցուցադրել սպանված բեն Լադենի լուսանկարը, որպեսզի բռնություն չհրահրվի, և լուսանկարները չդառնան պրոպագանդայի գործիք:
Ուսամա բեն Լադենի սպանությունից հետո ԶԼՄ-ներում հայտնվել են այս իրադարձության հետ կապված բազմաթիվ տարբերակներ:
Բեն Լադենը սպանվել է չորս օր տևած հատուկ գործողության ընթացքում ԱՄՆ-ի ռազմածովային ուժերի SEAL ստորաբաժանման կողմից: Սկզբում «ծովային արջերից» մեկն ասել էր, որ հենց ինքն է սպանել համար մեկ ահաբեկչին՝ նկատելով վերջինիս դռան մոտ:
Ավելի ուշ էլիտար ստորաբաժանման մեկ այլ անդամ Esquire ամսագրին տված հարցազրույցում հայտարարել էր, որ իրականում ինքն է սպանել բեն Լադենին: Նրա խոսքերով՝ ինքը կանգնած է եղել ահաբեկչի դիմաց, և երբ վերջինս ձգվել է, որպեսզի զենք վերցնի, կրակել է նրա ճակատին:
Հատուկ նշանակության ջոկատի մեկ այլ անդամ CNN-ի լրագրողին տված հարցազրույցի ժամանակ հերքել է վերոնշյալ տարբերակները: Նրա խոսքերով՝ ահաբեկչին սպանել են, երբ վերջինս պառկած է եղել հատակին:
Բացի այդ, բեն Լադենի ոչնչացման գործողության պաշտոնական տարբերակն էականորեն տարբերվում է «Ոչ հեշտ օր» գրքում առկա նկարագրությունից, որը Մարկ Օուեն ծածկանունով գրել է արդեն նախկին «ծովային արջ», 36-ամյա Մեթ Բիզոնեթը:
