Բրեստում ձերբակալել են խարդախների, որոնք տեղի խաղատանը խաբել էին՝ օգտվելով հատուկ կոնտակտային լինզաներից ու նշագրված խաղաքարտերից: Այս մասին հաղորդում է «Վիրտուալ Բրեստը»՝ հղում կատարելով տնտեսական հանցագործությունների դեմ պայքարի վարչությանը:
Խարդախության մեղադրանքով ձերբակալվել էին պոկերի երկու խաղացող՝ խաղատան մշտական այցելուները: Ինչպես հաղորդվում է, նրանք հանցավոր համաձայնության են եկել հաստատության երկու աշխատակիցների՝ ադմինիստրատորի ու խաղաքարտերը բաժանողի հետ:
Խարդախները համացանցով պատվիրել էին չինական արտադրության հատուկ կոնտակտային լինզաներ, ինչպես նաև հատուկ նշագրված խաղաքարտեր: Նշագրված խաղաքարտերը հնարավոր է եղել դիտել լինզաների օգնությամբ:
Նրանք խաղաքարտերը հանձնել էին խաղի ադմինիստրատորին ու նստել խաղալու՝ օգտվելով իրենց առավելությունից: Այդկերպ խաբեբաները կարողացել էին շահել 150 մլն բելառուսական ռուբլի (մոտ 17 հազար դոլար):
Հարուցվել է քրեական գործ («Առանձնապես խոշոր չափի խաբեություն»): Հոդվածը նախատեսում է 3-10 տարվա ազատազրկում:
