«Այստեղ ժամկետայնության խնդիր կա: Եթե մենք վերաֆինանսավորման տոկոսադրույքը բարձրացնում ենք, սա որոշակի կարճաժամկետ ազդեցություն թողնում է գնաճի զսպան առումով, բայց երկար ժամկետում նվազեցնում է տնտեսական աճը»,- այսօր լրագրողների հետ հանդիպման ժամանակ ասաց Արծվիկ Մինասյանը` պատասխանելով այն հարցին, թե որքանով է հիմնավորված վերաֆինանսավորման տոկոսադրույքը գնաճից բարձր սահմանելու դրույթը ՀՀ-ի պարագայում:
Նշենք, որ երեկ ԿԲ նախագահ Արթուր Ջավադյանը հայտարարել էր, թե ակադեմիական շրջանակներում ընդունված է, որ «բարձր գնաճի պայմաններում փողի գինը պետք է լինի ավելի բարձր, քան թե գնաճը»: Բայց այժմ Հայաստանում փողի գինը` վերաֆինանսավորման տոկոսադրույքը, ավելի ցածր է գնաճից (8.5%): Այդ պատճառով էլ, ըստ Ա. Ջավադյանի, մեր ԿԲ իրականացրած քաղաքականությունը ոչ թե կոշտագույն է, այլ կոշտ:
«Որ վերաֆինանսավորման տոկոսադրույքը գնաճից պետք է ավելի բարձր լինի, կարող է ճշմարիտ լինել այն դեպքում, եթե ԿԲ-ն բիզնես մտածողությամբ վարվի: Բայց ԿԲ-ն մեր պարագայում բիզնես մտածողությամբ չպետք է առաջնորդվի, որովհետև ինքը, որպես վերջին ատյանի վարկատու, պետք է տնտեսությանը հասցնի անհրաժեշտ ֆինանսներ: Այդ տրամաբանությունն է աշխատում նաև օտարերկրյա վարկերի պարագայում, երբ ԿԲ-ն և կառավարությունը արտասահմանյան վարկեր են վերցնում 0.75%-ով, կամ LIBOR+1: Եթե այդ տրամաբանությամբ գնանք, ուրեմն միջազգային կառույցներն էլ պետք է ասեին, որ քանի որ ՀՀ-ում գնաճը 10%-ից բարձր է, ուրեմն մենք Հայաստանին տրվող վարկերը 10-ից բարձր տոկոսադրույքով տանք, ասենք՝ 15%-ով: Այսինքն` տարբեր խնդիրներ են սրանք»,- ասաց Ա. Մինասյանը:
