Հայաստանի արտաքին քաղաքական բնագավառում վերջին շրջանում հիմնական ուշագրավ հանգամանքը հայ-վրացական հարաբերություններն են, ակտիվացել են նաև հայ-թուրքական գործընթացի շուրջ խոսակցությունները:
Ռազմավարական և ազգային հետազոտությունների հայկական կենտրոնի տնօրեն Մանվել Սարգսյանի գնահատմամբ, այդ ակտիվացումները բնական են և պատճառներ ունեն:
Անդրադառնալով հայ-թուրքական գործընթացին՝ Սարգսյանը նկատեց, թե այժմ բոլորը հույս ունեն, որ հայ-թուրքական գործընթացը կակտիվանա Թուրքիայի խորհրդարանական ընտրություններից հետո:
«Դա ընդամենը հույսեր են, որևէ էական փոփոխություն և հարց չի կարող լինել, և կոնկրետ բան չի խոսվում»,- ընդգծեց ՌԱՀՀԿ ղեկավարը:
Ինչ վերաբերում է հայ-վրացական հարաբերություններին, Սարգսյանը նշեց, որ այդ հարաբերությունների ակտիվացումն ու վրաց բարձրաստիճան պաշտոնյաների անընդհատ այցերը Հայաստան հիմնականում կապված են վրացական խորհրդարանի վերջին որոշման հետ` փակելու ռուսական ռազմամթերքի տրանզիտը:
«Սա, իհարկե, նոր վիճակ է, և իզուր չէ, որ անընդհատ բավական բարձր մակարդակի հայ-վրացական շփումներ գոյություն ունեն: Չի խոսվում, թե Վրաստանն ինչ առաջարկներ է անում Հայաստանին, բայց պարզ է, որ լուրջ խնդիրներ են շոշափվում, սակայն մեր կողմից պրակտիկորեն որևէ բան չի ասվում, թե ինչ քայլեր են կատարելու այս ուղղությամբ»:
