Բելառուսի նախագահ Ալեքսանդր Լուկաշենկոն հայտարարել է, որ կցանկանար Բելառուսում ևս մեկ ԱԷԿ կառուցել, եթե երկրի ֆինանսական հնարավորությունները թույլ տային, հայտնում է RIA Novosti-ն:
Բելառուսը կառուցում է ԱԷԿ (Գրոդնոյի մարզի Օստրովեցկի շրջան) երկու էներգաբլոկով՝ ընդհանուր 2,4 հազար մեգավատտ հզորությամբ:
Նախագիծը նախատեսում է ԱԷԿ-ի առաջին բլոկը շահգործել 2018 թ. նոյեմբերին, իսկ երկրորդը՝ 2020 թ. հուլիսին:
«Եթե հնարավորություն լիներ սկսել կառուցել երկրորդ ատոմակայանը, ապա ես անպայման այն կսկսեի կառուցել: Սակայն ես դեռ չունեմ ո՛չ փող, ո՛չ երկիր, որը վարկ կտար շինարարության համար»,- ասել է Լուկաշենկոն՝ հանդես գալով Բելառուսի Ագրարային համալսարանի ուսանողների առաջ:
Բելառուսական ԱԷԿ-ի շինարարության հասցեին հնչող քննադատությունները Բելառուսի նախագահն անհիմն է համարում։ «Մեր կայանն ու ռուսականը Կալինինգրադում, Եվրամիության ու Մերձբալթյան պետությունների կոկորդին կանգնած ոսկոր են»,- ասել է Լուկաշենկոն:
Նրա կարծիքով՝ Բալթյան երկրներն ուշացել են իրենց մոտ ատոմակայանի շինարարության հարցում: «Նրանք մեզ արդեն մրցակից չեն, ու նրանց հարկավոր է գնել մեր ու ռուսական էլեկտրաէներգիան»,- ասել է Լուկաշենկոն:
Նա ասել է, որ մրցակցային պայքար է ընթանում, ու եվրոպացիները հրահրում են բելառուսական ընդդիմությանը, որպեսզի վերջինս պայքարի տեղի ԱԷԿ-ի շինարարության դեմ:
