Մարդու իրավունքների եվրոպական դատարանը (ՄԻԵԴ), ինչպես սպասվում է, այսօր որոշում կկայացնի Ուկրաինայի նախկին վարչապետ Յուլյա Տիմոշենկոյի, այսպես կոչված, գազային գործի հետ կապված իր իրավունքները խախտվելու մասին բողոքի առնչությամբ: Հենց այդ գործով էլ նա դատապարտվել է ազատազրկման: Նախկին վարչապետը մեղադրվել է դեպի Ուկրաինա գազի մատակարարումների վերաբերյալ Ռուսաստանի հետ համաձայնագիր ստորագրելիս լիազորությունները գերազանցելու մեջ: 2011 թվականի հոկտեմբերի 11-ին նա դատապարտվել է 7 տարվա ազատազրկման: Այս մասին հայտնում է RIA Novosti-ն:
Մարդու իրավունքների եվրոպական դատարանին նա գանգատվել էր իր ձերբակալման հիմնավորումների բացակայությունից, քաղաքական ենթատեքստով հետապնդումից, բանտային վատ պայմաններից, բժշկական սպասարկման որակից և Մարդու իրավունքների եվրոպական կոնվենցիայի մի շարք հոդվածների խախտումից: Ըստ այդմ՝ նա նշել էր 3-րդ (Կտտանքների արգելում), 5-րդ (Ազատության և անձնական անձեռնմխելիության իրավունք), 8-րդ (Մասնավոր և ընտանեկան կյանքի հարգանքի իրավունք) և 18-րդ (Իրավունքների հանդեպ սահմանափակումներ կիրառելու շրջանակներ) հոդվածները:
2011 թվականի դեկտեմբերին Եվրոպական դատարանը որոշել էր առաջնահերթ կարգով քննարկել բողոքը, որից հետո Ուկրաինայի իշխանություններին հայտնեց պատշաճ պայմաններում Տիմոշենկոյի բուժհետազոտման անհրաժեշտության մասին: 2012-ի մայիսին դատարանը Ուկրաինայի ձեռնարկած միջոցառումները ճանաչեց համարժեք: