Սիրիայում վերջերս տեղի ունեցած ահաբեկչական գործողությունները վկայում են ավազակախմբերի և դրանց հետևում կանգնած ուժերի տապալման մասին: Այս մասին տնտեսական հանձնաժողովի նիստում այսօր հայտարարել է Սիրիայի վարչապետ Վաիլ Նադեր Ալ-Հալքին, ում ավտոշարասյան ճանապարհին Դամասկոսում առավոտյան ականապատված ավտոմեքենա է պայթեցվել:
Ահաբեկչական գործողությունը տեղի է ունեցել Մեզզա թաղամասում, որտեղ տեղակայված են դեսպանատները, կառավարական շենքերը, հատուկ ծառայությունների շտաբ-բնակարանները և որտեղ ապրում են շատ քաղաքական գործիչներ: Արդյունքում 6-12 մարդ է զոհվել, որոնց թվում՝ կառավարության ղեկավարի երկու թիկնապահներ: Վարչապետը չի տուժել և արդեն մի քանի ժամ անց իր աշխատասենյակում կառավարության նիստն է անցկացրել:
Արտակարգ պատահարի տեղում մեծ փոս է գոյացել: Ականապատված մեքենան մի քանի մասի է բաժանվել: Տուժել են նաև մոտակայքում կայանված մեքենաները, այդ թվում՝ երկու դպրոցական ավտոբուսներ: Սիրիայի իրավապահները կարծում են, որ պայթյունի հետևում կանգնած է «Ջեբհատ Ան-Նուսրա» ծայրահեղական իսլամական խմբավորումը:
