Նեպալում քրեական սկանդալի կենտրոնում են հայտնվել եվրոպացի ալպինիստները, որոնք աշխարհի ամենաբարձր գագաթ՝ Ջոմոլունգմա (Էվերեստ) բարձրանալիս կռվել են իրենց ուղեկցորդի հետ: Արդյունքում՝ տեղացիների ու զբոսաշրջիկների միջև ծեծկռտուք է սկսվել՝ հաղորդում է Sky News հեռուստաալիքը:
Ծովի մակերևույթից 8000 մետր բարձրության վրա տեղի ունեցած խուլիգանությանը մասնակցել են մարզիկ Սիմոն Մորոն, շվեյցարացի ալպինիստ Ուելի Ստեկն ու բրիտանացի Ջոնաթան Գրիֆիտը:
Ծեծկռտուքը տեղի էր ունեցել շաբաթ օրը՝ 8300 մետր բարձրության վրա: Էվերեստին հասնելու համար մնացել էր ընդամենը 500 մետր (8848):
Դրանից անմիջապես հետո տեղացի տուրօպերատորը, որը կազմակերպել էր Էվերեստ վերելքը, ռացիայով հաղորդել է ալպինիստների՝ բազա վերադառնալու մասին: Սակայն նրանց ներքև իջնել ու Կատմանդու վերադառնալ նույնպես արգելել են՝ գրում է The Daily Mail-ը:
Նախնական տվյալներով՝ ծեծկռտուքի հետևանքով ավելի շատ տուժել են զբոսաշրջիկները, որոնցից երկուսն ստացել են թեթև կապտուկներ, երրորդի դեմքին առկա է կտրող-ծակող գործիքով վնասվածք:
Ներկայում կողմերից յուրաքանչյուրը մեղադրում է մյուսին՝ արտասահմանցիները հայտարարում են, որ իրենց ուղեկիցները առաջինն են բռունցքներով հարձակվել իրենց վրա, իսկ վերջիններս էլ պնդում են, թե ստիպված էին պաշտպանվել ալպինիստներից:
Այժմ Նեպալի ոստիկանությունը ջանքեր է գործադրում՝ հասնելու դժվարամատույց տեղանքին ու հարցաքննելու դեպքի բոլոր մասնակիցներին:
Երկրի զբոսաշրջային ոլորտի ներկայացուցիչները մտավախություն ունեն, որ տեղի ունեցածը բացասաբար կազդի երկրի իմիջի վրա:
