Ես չեմ ասում, թե Հայաստանում կոռուպցիա չկա , բայց բոլոր այն խնդիրները, որոնք առնչվում են Հայաստանին, պետք է լուծվեն Հայաստանում: Նման կարծիք այսօր լրագրողների հետ հանդիպման ընթացքում հայտնեց «Ազգային անվտանգություն» կուսակցության նախագահ Գառնիկ Իսագուլյանը՝ անդրադառնալով Գառնիկ Մարգարյանի «Հակակոռուպցիոն կազմակերպությանն» ու դրա տրամադրած տվյալների շնորհիվ Հայաստանի երկրորդ նախագահ Ռոբերտ Քոչարյանի՝ Ռուսաստանի դատախազությունում հայտնվելուն:
Իսագուլյանն ամենևին լուրջ չի վերաբերվում Հայաստանի հակակոռուպցիոն կազմակերպությունների ծավալած գործունեությանը, որովհետև կարծում է, որ նախքան Ռուսաստան ներկայացնելը, իր իսկ խոսքերով ասած՝ «ռուսաց ցարին նամակ գրելը»՝ պետք է փաստերը ներկայացնեին հայ հանրությանը, ինչպես նաև՝ «հայոց ցարին»:
«Բոլոր նրանք, ովքեր Հայաստանի ներքին խնդիրները հանում են դուրս՝ առանց հայ հասարակությանը իրազեկելու, սխալ են անում: Ես էլ գիտեմ, որ Հայաստանում երբեմն ճշմարտություններ ասելը ծանր է նստում, բայց չի կարելի միանգամից նամակ գրել ռուսաց թագավորին: Նախ հայտնի էլ չէ, թե ինչ ցուցակ է։ Բոլորն էլ կարող են օդի մեջ անուններ հրապարակել, բայց թե ինչու կոնկրետ երկրորդ նախագահի անունը տալ և առանց պատշաճ ապացույցներ Հայաստանում ներկայացնելու վազել և Ռուսաստանում փորձել հարց լուծել, ես դա չեմ կարող ընկալել և ճիշտ համարել»,– ասաց նա:
Իր հերթին ասուլիսի մյուս բանախոսը՝ ԳԽ նախկին պատգամավոր Ազատ Արշակյանն ասաց, որ Գառնիկ Մարգարյանին հարգում է՝ որպես նախկին չեկիստի և զինվորականի, և «պետք է նայել նրա գործի ոչ թե ձևական կողմին, այլ՝ ըստ էության»։ «Կոռուպցիան վերացնելն ամբողջովին անհնար է, բայց բավականին լուրջ առաջընթաց կլինի, եթե մենք գնանք այս ուղղությամբ»,- ասաց նա:
Լուսանկարը՝ PanARMENIAN Photo-ի
