«Դա գնահատական է, որ բոլոր այն անձինք, որոնք ներգրավված են եղել այս հանցավոր գործընթացում, պետք է հնարավորություն չունենան մասնակցելու տվյալ պետության կողմից իրականացվող ժողովրդավար ծրագրերին»,- «Առաջին լրատվական»-ի հետ զրույցում ասաց «Ժառանգություն» խմբակցության պատգամավոր Զարուհի Փոստանջյանը՝ անդրադառնալով դեկտեմբերի 6-ի հանրաքվեի վերաբերյալ Հայաստանում ԱՄՆ դեսպանատան հայտարարությանը:
Հիշեցնենք, որ ԱՄՆ դեսպանատունը դեկտեմբերի 14-ին հայտարարություն էր տարածել, թե շարունակում են հետևել հանրաքվեի հետ կապված քվեների վերահաշվարկի ընթացքին: Իսկ ավելի վաղ մտահոգություն էինք հայտնել հանրաքվեի ընթացքում տեղ գտած խախտումների համար: «Հաշվի առնելով այն հանգամանքը, որ Միացյալ Նահանգներն աշխարհով մեկ պայքարում է կոռուպցիայի դեմ, դեկտեմբերի 6-ի հանրաքվեի անաչառ անցկացմանն ուղղակիորեն միջամտած անձանց մասին հրապարակումներում տեղ գտած տեղեկությունները կարող են նաև կիրառվել ԱՄՆ դեսպանատան կողմից՝ դեսպանության ծրագրերում ու միջոցառումներում մասնակիցների ներգրավումը դիտարկելիս»,- նշված է դեսպանատան հաղորդագրության վերջում:
Արդյոք սա նշանակում է, որ ԱՄՆ-ը պատժամիջոցներ է կիրառելու այն անձանց նկատմամբ, որոնց անունները շոշափվում են ընտրակեղծիքներ անելու մեջ: «Ցանկացած պետություն ունի իրավախախտների վերաբերյալ իր վերաբերմունքի շրջանակը և սա հավանաբար այդ շրջանակներից մեկն է: Կարող եմ ասել, որ բոլոր այն անձինք, որոնք խառնված են հանցավոր գործընթացներում, տվյալ պետությունների կողմից չեն համարվում հուսալի անձինք, հետևաբար նրանց նկատմամբ ոչ վստահելի վերաբերմունք է ցուցաբերվում»,- ասում է Զ.Փոստանջյանը:
Վերջինիս խոսքերով՝ դեկտեմբերի 6-ին տեղի ունեցած սահմանադրական փոփոխությունների հանրաքվեի ժամանակ օգտագործվել է ընտրակեղծարարության ողջ զինանոցը:
