ՕՊԵԿ-ի որոշումը՝ բարձրացնել նավթի արդյունահանման քվոտան մինչև իրական արդյունահանման մակարդակի, Նյու Յորքի ապրանքային բորսայում հանգեցրել է նավթի գնի կտրուկ նվազման՝ $1,11-ով: Ուրբաթ օրվա առևտրի վերջում WTI տեսակի նավթի գինը նվազել է մինչև 39,97 դոլար՝ 1 բարելի դիմաց:
«Արդյունահանման ծավալների մեծացման որոշումը արտացոլում է կոնսենսուսը, որ ձեռք է բերվել ՕՊԵԿ-ի քաղաքականության մշակման հարցով հանդիպման ընթացքում, ըստ որի՝ նավթի գինը պետք է ընկնի մինչև նվազագույնը, որպեսզի կանխվի նոր մատակարարների մուտքը շուկա ՕՊԵԿ անդամ չհանդիսացող երկրներից»,- հայտարարել է էներգետիկական ռազմավարությունների ֆրանսիական BNP Paribas բանկի մասնագետ Հարրետ Լյուիս-Դեվիսը Bloomberg-ին:
Ներկայումս ՕՊԵԿ-ի անդամ երկրների կողմից արդյունահանվող նավթի ծավալները գնահատվում են օրական 31-32 միլիոն բարել: Միջազգային էներգետիկական գործակալության տվյալներով՝ համաշխարհային շուկայում նավթի առաջարկը գերազանցում է պահանջարկին օրական մոտ 2 միլիոն բարելով:
