Վրացական Apsny.ge կայքի փոխանցմամբ, Վրաստանում գտնվող Եվրոպայի և Եվրասիայի հարցերով ԱՄՆ փոխպետքարտուղարի օգնական Թինա Քեյդենաուն վրացական իշխանությունների հետ 3.5 ժամ տևած հանդիպման ժամանակ անդրադարձել է ռուս-վրացական հարաբերություններին և Վրաստանի ներքին խնդիրներին.
«ԱՄՆ-ը աջակցում է Առևտրի համաշխարհային կազմակերպությանը (ԱՀԿ) Ռուսաստանի անդամակցությանը և հուսով է, որ այդ խնդրի շուրջ Վրաստանի ու Ռուսաստանի միջև տեղի ունեցող բանակցությունների ժամանակ կողմերին կհաջողվի գտնել այնպիսի պայմաններ, որոնք կնպաստեն ԱՀԿ-ին Ռուսաստանի անդամակցությանը:
Սակայն ԱՄՆ-ը կարծում է, որ այդ հարցում Վրաստանի օրինական անհանգստությունը պետք է հաշվի առնվի: ԱՄՆ-ը աջակցում է Վրաստանի տարածքային ամբողջականությանը և հանդես է գալիս 2008 թվականի օգոստոսի 12-ին Ռուսաստանի հետ կնքված զինադադարի մասին համաձայնագրի իրագործման օգտին, որով նախատեսվում էր վերադարձ կատարել նախապատերազմյան դիրքերին»:
Քեյդենաուն անդրադարձել է նաև Վրաստանի ժողովրդավարության խնդիրներին. «Անհրաժեշտ է հարգել օրենքի գերակայության, ԶԼՄ-երի թափանցիկության և դատական համակարգի բարեփոխումներին առնչվող սկզբունքները:
Քանի որ Վրաստանը գտնվում է նախընտրական շրջանում, ուստիև անհրաժեշտ է, որ ընթացիկ տարում բարեփոխումներ իրականացնի նաև ընտրական ոլորտում: Մեզ համար հուսադրող է, որ վրացական ընդդիմությունը տվյալ խնդրի շուրջ բանակցություններ է վարում իշխանությունների հետ: Մենք կողմնակից ենք, որ նախքան ընտրությունները այդ բանակցությունները որոշակի արդյունք արձանագրեն»:
Հիշեցնենք, որ Վրաստանում խորհրդարանական ընտրությունները կայանալու են 2012 թվականին:
