Ռուսական RIA Novosti լրատվական գործակալության փոխանցմամբ՝ Թուրքիայի վարչապետ Ահմեթ Դավութօղլուն Բրյուսելում ՆԱՏՕ-ի գլխավոր քարտուղար Յենս Սթոլթենբերգի հետ համատեղ մամուլի ասուլիսի ժամանակ խոստացել է, որ Անկարան սահմանափակումներ չի կիրառի Ռուսաստանի քաղաքացիների նկատմամբ:
«Մենք չենք անի այնպիսի գործողություններ, որոնք բացասաբար կազդեն ռուս ժողովրդի վրա։ Ռուս ժողովուրդը մեր ժողովրդի բարեկամն է։ Անթալիան շատ ռուսաստանցիների համար դարձել է երկրորդ տուն։ Մենք սպասում ենք ռուսաստանցի զբոսաշրջիկներին»,- ասել է Թուրքիայի վարչապետը։
Դավութօղլուն հիշեցրել է, որ Թուրքիան մշտապես դեմ է արտահայտվել պատժամիջոցների սահմանմանը, և զարմանք է հայտնել, որ պատժամիջոցների տակ ընկած Ռուսաստանն ինքն է որոշել գնալ այդ քայլին և Թուրքիայի հանդեպ պատժամիջոցներ սահմանել։
Դավութօղլուն հայտարարել է, որ երկու երկրների տնտեսական հարաբերությունները շատ կարևոր են, և Ռուսաստանին կոչ է արել գործել՝ առաջնորդվելով երկու երկրների շահերով։ Դավութօղլուն ընդգծել է, որ իրենք պատրաստ են քննարկել երկու երկրների հարաբերությունների ապագան։
