Նոյեմբերի 28-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունել է Վրաստանի եզդիների հոգևոր խորհրդի նախագահ Դիմիտրի Պիրբարիի գլխավորած պատվիրակությանը` ուղեկցությամբ Հայաստանի եզդիական համայնքի ներկայացուցիչների:
Նորին Սրբությունը, ողջունելով Վրաստանի եզդիների հոգևոր խորհրդի պատվիրակության այցը համայն հայության հոգևոր կենտրոն, անդրադարձել է հայ և եզդի ժողովուրդների հարաբերություններին` նշելով, որ դրանք հատկանշված են ամուր եղբայրական կապերով: Ամենայն Հայոց Կաթողիկոսը գոհունակությամբ հաստատել է, որ Հայաստանում եզդիները, ապրելով հայ ժողովրդի կողքին, ազատորեն կազմակերպում են իրենց ազգային-հոգևոր կյանքը:
Իր հերթին Վրաստանի եզդիների հոգևոր խորհրդի նախագահը ներկայացրել է Վրաստանում եզդիների, հայ համայնքի ու Վիրահայոց թեմի միջև ձևավորված սերտ գործակցային հարաբերությունները: Խոսելով Հայաստանի եզդիական համայնքի մասին` նա, հանուն ՀՀ-ում ապրող եզդի ազգաբնակչության, շնորհակալություն է հայտնել Նորին Սրբությանը վերջիններիս կրոնական և ազգային ավանդությունների պահպանման հարցում ցուցաբերած հոգածու վերաբերմունքի համար:
Հանդիպմանը ներկա է եղել նաև Մայր Աթոռի Վարչատնտեսական բաժնի տնօրեն Գերաշնորհ Տ. Մուշեղ եպիսկոպոս Բաբայանը:
