Վրացական Apsny.ge կայքի փոխանցմամբ, այս տարվա առաջին եռամսյակին Վրաստանի արտաքին առևտրի ծավալը կազմել է 1860 միլիարդ դոլար, ինչը 36 տոկոսով ավելի է նախորդ տարվա համանման ցուցանիշի համեմատ: Միևնույն ժամանակ առևտրային բացասական հաշվեկշիռը կազմել է 934 միլիոն դոլար, ինչը նույնպես 36 տոկոսով ավելի է նախորդ տարվա համանման ցուցանիշից:
2011 թվականի առաջին երեք ամիսներին վրացական արտահանումը կազմել է 464 միլիոն դոլար (2009-ի համեմատ` 35 տոկոսով ավելի), իսկ ներկրումը` 1390 միլիարդ դոլար (2009-ի համեմատ` 36 տոկոսով ավելի):
Վրաստանի խոշորագույն առևտրային գործընկերը Թուրքիան է`286 միլիոն դոլար, ապա գալիս են Ուկրաինան` 204 միլիոն դոլար, Ադրբեջանը` 192.8 միլիոն դոլար, Չինաստանը` 102.4 միլիոն դոլար, Գերմանիան` 98.3 միլիոն դոլար, ԱՄՆ-ը` 90.2 միլիոն դոլար, Ռուսաստանը` 83.3 միլիոն դոլար, Հայաստանը` 61 միլիոն դոլար, Բուլղարիան 55.1 միլիոն դոլար և ԱՄԷ-ն` 51.8 միլիոն դոլար:
Այս տարվա առաջին եռամսյակին մարդատար ավտոմեքենաների վերաարտահանումը կազմել է 95.1 միլիոն դոլար` ընդհանուր արտահանման 21 տոկոսը: Բացի այդ, Վրաստանից արտահանվել է 54.3 միլիոն դոլարի երկաթե համաձուլվածք, 40.7 միլիոն դոլարի ազոտ պարունակող պարարտանյութ, 37.9 միլիոն դոլարի սև մետաղ:
Միևնույն ժամանակահատվածում ներկրման ոլորտում առաջին տեղը զբաղեցրել են նավթն ու նավթամթերքը` 169.5 միլիոն դոլար, ապա գալիս են նավթային գազերն ու գազային ածխաջրածինները` 85.9 միլիոն դոլար, մարդատար ավտոմեքենաները` 82.2 միլիոն դոլար, ցորենը` 48.7 միլիոն դոլար, բժշկական միջոցները` 44.9 միլիոն դոլար, հեռախոսային ապարատները` 32.3 միլիոն դոլար:
