Ամեն տարի ԱՄՆ-ում Գոհաբանության օրվանից հետո՝ նոյեմբերի վերջին ուրբաթ օրը, մեկնարկում է հայտնի Սև ուրբաթը, որն ամենևին էլ չի համապատասխանում իր մռայլ անվանմանը՝ գրում է Calend-ը: Սև ուրբաթը տարվա ամենավառ և անմոռանալի ուրբաթն է, այդ օրը տեղի են ունենում հսկայական զեղչեր և ապրանքների վաճառքներ, այն գլխավոր տոնն է շոփինգի բոլոր սիրահարների համար:
Արևմտյան երկրներում հենց Սև ուրբաթից է սկսվում սուրբծննդյան վաճառքի սեզոնը, երբ հնարավոր է ձեռք բերել ամենատարբեր ապրանքներ ձեռնտու գներով. զեղչերը տատանվում են 30-90 տոկոսի շրջանակներում՝ կախված ապրանքի տեսակից:
Այս ավանդույթն ԱՄՆ-ում հիմնվել է դեռևս 19-րդ դարում, երբ խոշոր առևտրի ցանցերը սկսել են մեծ նախածննդյան զեղչեր հայտարարել: Իսկ Սև ուրբաթ տերմինն առաջացել է 1966-ին, Ֆիլադելֆիայում: Ավանդույթը հետագայում տարածվել է այլ երկրներում:
Նշվում է, որ վարկածներից մեկով՝ անվանումն առաջացել է ճանապարհներին առաջացած խցանումների պատճառով, որը գոյացել է Գոհաբանության օրից հետո, իսկ մեկ այլ վարկածով՝ օրվա անվանումը կապված է այդ օրը հաշվապահական հաշվետվության հետ:
