Վերաքննիչ քրեական դատարանի վարույթում է զինծառայողներ Տարոն Գ.-ի, Սերյոժա Կ.-ի, Շիրազ Գ.-ի գործով բերված վերաքննիչ բողոքների քննությունը:
Գործը քննվել է Սյունիքի մարզի ընդհանուր իրավասության դատարանում Դավիթ Գրիգորյանի նախագահությամբ:
Ըստ մեղադրանքի՝ 26-ամյա վաշտի հրամանատար, կոչումով ավագ լեյտենանտ Տարոն Գ.-ն 2015 թվականի փետրվարի 10-ին ստուգում կատարելու նպատակով գնացել է մարտական դիրք:
Այնտեղ ստուգում կատարելու փոխարեն, խախտելով մարտական հերթապահություն կրելու կանոնները, նույն դիրքի ավագ, դասակի հրամանատար, կոչումով ավագ լեյտենանտ Տիգրան Ս.-ի հետ Տարոնն օգտագործել է ոգելից խմիչք:
Այնուհետև, ժամը 19-ն անց 55-ի սահմաններում ավագ լեյտենանտ Տարոնը անհարկի լիցքավորել է Տիգրանին ամրակցված ինքնաձիգը և կրակահերթ է արձակել, ինչի հետևանքով ավագ լեյտենանտ Տիգրան Ս.-ն ստացել է հրազենային գնդակային վիրավորում և հոսպիտալ տեղափոխելու ճանապարհին մահացել է:
Տարոն Գ.-ն արգելանքի տակ է առնվել 2015 թվականի փետրվարի 11-ից:
20-ամյա ժամկետային զինծառայող, ջոկի հրամանատար, կոչումով սերժանտ Սերյոժա Կ.-ն և 20-ամյա ժամկետային զինծառայող, շարքային Շիրազ Գ.-ն այդ նույն օրը՝ փետրվարի 10-ին, ժամը 20-ի սահմաններում նույն դիրքում դեպի չեզոք գոտի են նետել ու ոչնչացրել 11 հատ փամփուշտներ:
Ընդհանուր իրավասության դատարանում ամբաստանյալներն իրենց մեղավոր են ճանաչել և միջնորդել են գործը քննել արագացված կարգով:
Տուժողի իրավահաջորդը քաղհայցի պահանջ չի ներկայացրել, չի առարկել արագացված կարգի կիրառման դեմ:
Տարոն Գ.-ն մեղավոր է ճանաչվել ՀՀ քրեական օրենսգրքի 365 հոդվածի 3-րդ մասով, որով օրենքով նախատեսված առավելագույն պատիժը 8 տարի ազատազրկումն է:
Դատարանը հաշվի է առել Տարոնի ծառայողական դրական բնութագիրը, այն, որ նա լավ ծառայության համար պարգևատրվել է մեդալներով, բազմիցս խրախուսվել է շնորհակալագրերով, պատվոգրերով, այլ պարգևներով:
Որպես Տարոն Գ.-ի պատասխանատվությունն ու պատիժը ծանրացնող հանգամանք՝ դատարանը հաշվի է առել հանցավոր արարքը ալկոհոլի ազդեցության տակ կատարելը:
Տարոն Գ.-ն դատապարտվել է 4 տարի 6 ամիս ազատազրկման:
Սերյոժա Կ.-ն ու Շիրազ Գ.-ն մեղավոր են ճանաչվել ՀՀ քրեական օրենսգրքի 369 հոդվածի 1-ին մասով:
Ջոկի հրամանատար Սերյոժան դատապարտվել է կարգապահական գումարտակում 3 ամիս ժամկետով պահելուն: Պատժի սկիզբը կհաշվվի դատավճիռն ուժի մեջ մտնելուց հետո՝ փաստացի պատիժը կրելու օրվանից:
Նույն պատժին է դատապարտվել նաև նույն հոդվածով մեղավոր ճանաչված շարքային Շիրազ Գ.-ն, բայց նրա նկատմամբ պայմանական դատապարտություն է կիրառվել, և սահմանվել է 1 տարի փորձաշրջան:
