Ադրբեջանական Trend.az կայքի փոխանցմամբ, Ղրղզստանի վարչապետ Ալմազբեկ Աթամբաևը երկօրյա պաշտոնական այցով ժամանել է Թուրքիա: Այս մասին հայտարարել է Ղրղզստանի կառավարության մամլո ծառայությունը:
Նախատեսվում է, որ Աթամբաևը Թուրքիայում հանդիպումներ է ունենալու վարչապետ Ռեջեփ Թայիփ Էրդողանի ու նախագահ Աբդուլլահ Գյուլի հետ:
Հանդիպումների ընթացքում կողմերը քննարկելու են երկու երկրների միջև զբոսաշրջության, գյուղատնտեսության, կրթության ոլորտների զարգացման և ներդրումների ներգրավման խնդիրները:
Երկկողմանի բանակցությունների արդյունքում պետք է ստորագրվի համատեղ փաստաթուղթ: Բացի այդ, քննարկվելու է երկու երկրների միջև անցագրային ռեժիմի վերացման հարցը:
Աթամբաևը մասնակցելու է նաև թուրք-ղրղզական գործարար ֆորումի աշխատանքներին, հանդիպելու է թուրքական համալսարաններում ուսանող իր հայրենակիցների հետ:
Հիշեցնենք, որ այս տարվա փետրվարի սկզբին Ղրղզստան էր այցելել Էրդողանը. դա Ղրղզստանում իրականացված իշխանափոխությունից հետո այդ երկիր այցելած նման կարգի բարձր պաշտոնյայի առաջին այցն էր:
Էրդողանը Ղրղզստանին խոստացել էր հատկացնել 10 միլիոն դոլար` բյուջեի դեֆիցիտի կրճատման համար, ինչպես նաև 450 միլիոն դոլարի ներդրում անել Ղրղզստանում և վերջինիս ավերված հարավային հատվածի վերականգնման համար հատկացնել 15 միլիոն դոլարի օգնություն:
2008 թվականին երկու երկրների միջև ապրանքաշրջանառությունը կազմել է 240 միլիոն դոլար, 2009 թվականին` 110 միլիոն դոլար, 2010 թվականին` 107 միլիոն դոլար: Ընդ որում` թուրքական արտահանումը կազմել էր 77 միլիոն դոլար, իսկ ներկրումը` 30 միլիոն դոլար:
