«Առաջին լրատվական»-ի զրուցակիցն է սահմանադրական փոփոխությունների դեմ պայքարող «Նոր Հայաստան» հանրային փրկության ճակատի անդամ, «Հիմնադիր խորհրդարանի» փոխնախագահ Վարուժան Ավետիսյանը։
– Պարոն Ավետիսյան, «Նոր Հայաստանը» ե՞րբ է սկսելու օգտվել քարոզչության անվճար եթերաժամից։
– Մենք արդեն սկսել ենք անվճար եթերաժամից օգտվելու մեր իրավունքը իրացնել։ Մենք այսօր արդեն առաջին քարոզչական նյութերն ենք ուղարկել Հանրային հեռուստատեսություն և ռադիո։ Շրջագայում ենք մարզերով՝ ժողովրդին իրազեկելու նպատակով։
– Հետագա քայլերը որո՞նք են լինելու։
– Քարոզչությունն արդեն հեռուստատեսությամբ և եթերով կգնա, գումարած դրան՝ մենք ժողովրդի հետ հանդիպումներ ենք անցկացնում, մեր խոսքն ենք ասում։ Բոլոր երեք ուղղություններով մենք դա իրականացնում ենք, շուտով արդեն թռուցիկներով, բուկլետներով մեր խոսքը կհասցնենք։
– «Այո»-ի շտաբը ևս սկսել է քարոզչություն իրականացնել։ Ինչպե՞ս եք պատրաստվում դիմակայել Հանրապետական կուսակցությանը։
– Գիտեք, զուտ տեխնիկական և այլ հնարավորությունների իմաստով պարզապես հնարավոր չէ իրենց հետ մրցակցել, որովհետև իրենք հանրային ամբողջ ռեսուրսները յուրացրել են, իրենք են օգտագործում։ Բայց մյուս կողմից՝ իրենք իրենցով հակաքարոզչություն են. միայն իրենց այսօրվա կառավարումը և դեմքերը բավարար են, որ մարդիկ իրենց «ոչ» ասեն։ Իրենց տեսնելուց արդեն մարդիկ միայն «ոչ» ասելու մասին են մտածում։ Մեզ ընդամենը մնում է համաժողովրդական ատելության այդ ալիքի վրա մի փոքր շարժում անել և ուղղորդել։ Ամբողջ բնակչությունն ատում է իրենց, որպես թշնամի է տեսնում։ Մենք ենք ավելի մեղմացնում մոտեցումները։ Իրենց հետ տեխնիկապես մրցակցել հնարավոր չէ, բայց էության մեջ իրենք են ավելի ոչ շահեկան վիճակում։
– Պայքարի այս ընթացքում ի՞նչ լուրջ խոչընդոտների է հանդիպել «Ոչ»-ի ճակատը։
– Խոչընդոտները հիմնականում մարդիկ չեն տեսնի։ Դրանք իրականացվում են ուժային համակարգի և քրեական տարրերի միջոցով, ակտիվ մարդկանց փորձում են ճնշել, հեռու պահել։ Հիմնականում այս ուղղությամբ են աշխատում։ Միևնույն ժամանակ, փորձում են մեր նկատմամբ բացասական տրամադրություններ ստեղծել։ Ամբողջ ուժային համակարգը իր գործակալական և քրեական ենթահամակարգերով ու բաղադրիչներով գործի է դրված։ Մենք հասկանում ենք, որ իրենք գրպանում ունեն հանրաքվեի արդյունքը, որովհետև մեր երկրում ընտրությունները չեն կարող արդար լինել։ Սա ընդամենը միջոցառում է, որ ցույց տան, թե շատ հեշտությամբ կարող են անցկացնել, բայց ժողովուրդն ուրիշ բան է ուզում։ Ժողովուրդն ուզում է, որ իրենք և իրենց Սահմանադրությունը չլինեն։ Դրա համար մենք դեկտեմբերի 1-ին ժողովրդին հրավիրում ենք հրապարակ՝ դրա կարգը և ձևը որոշելու համար։
Հիշեցնենք, որ «Նոր Հայաստան» հանրային փրկության ճակատը ժողովրդի մոբիլիզացիայի օր է հայտարարել դեկտեմբերի 1-ը և պատրաստվում է քաղաքացիական անհնազանդությունների միջոցով տապալել սահմանադրական հանրաքվեն։