Հայաստանը շարունակում է մնալ պարտքի` գերազանցապես նվազ բեռ ունեցող երկիր: Սա երևում է ԿԲ այսօրվա հրապարակած «Ֆինանսական կայունության հաշվետվություն, 2010» պարբերականից: Պարտքի ծանրության աստիճանը գնահատվել է ըստ հետևյալ 4 ցուցանիշների` պարտք/ՀՆԱ, պարտք/արտահանում, պարտքի սպասարկում/արտահանում, տոկոսավճար/արտահանում:
Առաջին ցուցանիշը 2010 թ. վերջին կազմել է 35.1%` էականորեն ցածր լինելով սահմանային մակարդակից (50%): Ընդ որում, նշենք, որ այս սահմանային մեծությունը զարգացած երկրները հիմնականում խախտում են, թեև դա որևէ դժվարություն չի առաջացնում նրանց համար պարտքը մարելիս: Այսպես`2010-ին Իտալիայում պետական պարտք/ՀՆԱ ցուցանիշը կազմել է մոտ 120%, Իռլանդիայում` 100%, Պորտուգալիայում և Ֆրանսիայում` մոտ 90%, Մեծ Բրիտանիայում` 80%, Գերմանիայում` 75%, Իսպանիայում` 65%:
Մյուս ցուցանիշը` պարտք/արտահանում, 2010 թ. վերջին կազմել է 182.1%, ինչը համարվում է միջին պարտքի բեռ: 2009 թ. ևս այս ցուցանիշով մենք միջին պարտքի բեռ ունեցող երկիր էինք (227%), իսկ դրանից առաջ եղել ենք նվազ պարտքի բեռ ունեցող (2005-2008 թթ. այս ցուցանիշը ցածր է եղել 90%-ից):
Պարտքի սպասարկում/արտահանում ցուցանիշը 2009-ին կազմել է 6%, 2010-ին` 5%, և այս թվերով ևս մենք համարվում ենք պարտքի նվազ բեռ ունեցող երկիր: Նմանապես նվազ բեռ է համարվում նաև մեր տոկոսավճար/արտահանում ցուցանիշը (2.4%` 2010 թ., 2%` 2009 թ.):
