ՄԱԿ-ին ուղղված միջնորդագիրը ստորագրել է երկուսուկես հազար մարդ՝ ընդդեմ երբեմնի հանրաճանաչ երգիչ և երաժիշտ Ֆիլ Քոլինզի՝ բեմ վերադարձի որոշման դեմ: Այս մասին գրում է BBC-ն:
64-ամյա Քոլինզի վերջին՝ Testify ալբոմը լույս է տեսել 2002-ին:
2011-ին նա բարձրաձայն հայտարարել է իր երաժշտական կարիերայի ավարտի մասին, սակայն այժմ միտքը փոխել է:
«Իմ 10 և 14 տարեկան երեխաները ցանկանում են իմանալ, թե ինչով է զբաղվում իրենց հայրը: Նրանց դուր է գալիս իմ երաժշտությունը, և հրաշալի կլիներ, եթե նրանք կարողանային դա կենդանի լսել»,- ասել է Քոլինզը:
Սակայն պարզվում է՝ Genesis-ի նախկին թմբկահարի և վոկալիստի երաժշտությանը բոլորը չէ, որ համակրանքով են վերաբերվում:
«Աշխարհում առանց այդ էլ շատ են տառապանքները: Ֆիլ Քոլինզին պետք է կանգնեցնել»,- ասվում է ՄԱԿ-ին ուղղված միջնորդագրում՝ պահանջելով թույլ չտալ նրա վերադարձը բեմ:
Դրա ներքո արդեն ստորագրել է երկուսուկես հազար մարդ:
