Սիրիայի հարցով ՄԱԿ-ի գլխավոր քարտուղարի հատուկ ներկայացուցիչ Լախդար Բրահիմին, չնայած հնարավոր հրաժարականի մասին տեղեկություններին, հաջորդ շաբաթ ՄԱԿ-ի Անվտանգության խորհրդին կտեղեկացնի իր աշխատանքի մասին՝ ուրբաթ լրագրողներին հայտնել է ՄԱԿ-ի գլխավոր քարտուղարի պաշտոնական ներկայացուցչի տեղակալ Էդուարդու դել-Բուեյը: Այս մասին հայտնում է RIA Novosti-ն:
«Բրահիմին Նյու Յորքում կլինի ապրիլի 19-ին և բրիֆինգ կանցկացնի Անվտանգության խորհրդում, որից հետո կհանդիպի լրագրողների հետ»,- ասել է դել-Բուեյը: Այլ մանրամասներ նա չի ներկայացրել:
Ավելի վաղ արաբական ԶԼՄ-ներում տեղեկություններ էին հայտնվել, որ ապրիլի 18-ին՝ ՄԱԿ ԱԽ-ում ելույթից մեկ օր առաջ, Բրահիմին վայր կդնի Սիրիայի հարցով ՄԱԿ-ի և ԱՊԼ-ի հատուկ բանագնացի պարտականությունները, որոնց թվում էր սիրիական ճգնաժամի խաղաղ կարգավորման բանաձևի որոնումը:
ՄԱԿ ԱԽ-ի կենտրոնակայանում Բրահիմիի հրաժարականի մասին դեռևս ոչինչ չի խոսվում:
Ռուսաստանի արտգործնախարարի տեղակալ Գենադի Գատիլովը Twitter-ի իր միկրոբլոգում գրել էր, որ Բրահիմիի հնարավոր հրաժարականը բացասաբար կազդի Սիրիայում հակամարտության կարգավորման որոնման ջանքերի վրա: Գատիլովի խոսքով՝ Բրահիմին բոլոր կողմերի հետ ձգտում է համագործակցության, սակայն սիրիական ընդդիմությունը մինչ այժմ ընդառաջ չի գնում, դրանով հետաքրքրված չեն նաև որոշ արտաքին խաղացողներ:
Սիրիայում հակամարտությունը շարունակվում է 2011 թվականի մարտից: ՄԱԿ-ի տվյալներով՝ այս ընթացքում այդ երկրում զոհվել է առնվազն 70 հազար մարդ:
