Ադրբեջանական Turan լրատվական գործակալության փոխանցմամբ՝ ԱՄՆ սենատում հոկտեմբերի 28-ին լսումներ են անցկացվել Ադրբեջանում մարդու իրավունքների խախտումների վերաբերյալ։ Բաքվում ԱՄՆ նախկին դեսպան Ռիչարդ Կոզլարիչը լսումների ժամանակ հայտարարել է, որ Ադրբեջանն ԱՄՆ-ի կարևոր գործընկերն է:
«Սակայն գործընկերը, որը կոպտորեն ոտնահարում է մարդու հիմնարար իրավունքները՝ ներառյալ խոսքի ազատությունն ու մամուլի ազատության իրավունքը, չի կարող լինել հուսալի գործընկեր։ Բաքուն նախկինի նման ցանկանում է մնալ Ամերիկայի ռազմավարական գործընկերը, սակայն այդ դեպքում նա պետք է հասկանա, որ ռազմավարական գործընկերները պետք է ունենան ընդհանուր շահեր։
Մեզ ասում են, որ Ադրբեջանն ապրում է բարդ միջավայրում, նա ունի բարդ հարևաններ, ինչի համար էլ ԱՄՆ-ը չպետք է ուշադրություն դարձնի, որ երկրի բանտերում գտնվում է 90 քաղբանտարկյալ։ Սակայն դրանք մարդու իրավունքների խնդիրներ են, որոնց հետ կապ չունեն Ռուսաստանը, Իրանը կամ ԱՄՆ-ը. դրանք ստեղծվել են Բաքվի վարչակարգի կողմից։
Նա, ով պատասխանատու է Ադրբեջանում մարդու իրավունքների ներկայիս խախտումների համար, պետք է նվազագույնը ենթարկվի ֆինանսական ու արտասահմանյան այցերի հարցում պատժամիջոցների սահմանման»,- ասել է նա։
