Բաղդադը Վաշինգտոնին չի խնդրել իրաքյան տարածքում ԱՄՆ ցամաքային հատուկ ծառայությունների անցկացման մասին և դրանց կարիքը չունի: Այս մասին չորեքշաբթի NBC հեռուստաալիքի եթերում հայտարարել է Իրաքի վարչապետի ներկայացուցիչ Սաադ ալ-Հադիթին:
«Դա Իրաքի գործն է, և կառավարությունն ԱՄՆ պաշտպանության նախարարությանը չի խնդրել մասնակցել ցամաքում գործողություններին,- նշել է նա:- Մենք բավականաչափ ցամաքային զորքեր ունենք»: Ալ-Հադիթին նաև հայտարարել է, որ ԱՄՆ-ի կողմից ցանկացած ռազմական միջամտություն «պետք է համաձայնեցվի Իրաքի կառավարության հետ»:
Միաժամանակ Ալ-Հադիթին նշել է այն աջակցության կարևորությունը, որն ԱՄՆ զորքերը ցուցաբերում են իրաքյան բանակին՝ հայտարարելով, որ իր երկիրը Վաշինգտոնի օգնության կարիքն ունի «զենքի և զինծառայողների պատրաստման առումով»:
Երեքշաբթի ԱՄՆ Կոնգրեսի սենատի զինված ուժերի հարցերով կոմիտեում լսումների ընթացքում Պենտագոնի ղեկավար Էշթոն Քարտերն օրենսդիրներին հավաստիացրել է, որ Վաշինգտոնը մտադիր չէ հրաժարվել ԴԱԻՇ-ի դիրքերի վրա իր գործընկերների հարձակումներին աջակցությունից, նաև «այդպիսի առաքելությունների իրագործումից ուղղակիորեն ինչպես օդից հրավածների օգնությամբ, այնպես էլ՝ ցամաքում անմիջական գործողությունների միջոցով»:
