«Շիրակի մարզի Առափի, Պեմզաշեն, Թորոս գյուղ և Արևշատ համայնքները տուգանվել են ընդհանուր առմամբ կես միլիոն դրամով, առաջին երկու համայնքը՝ 150 հազարական դրամով, վերջին երկուսը` 100 հազարական դրամով,- «Առաջին լրատվական»-ի հետ զրույցում նշեց Շիրակի մարզպետարանի Հողօգտագործման և հողաշինության բաժնի պետ Զորիկ Խաչատրյանը` հավելելով, որ տուգանողը եղել է ՀՀ Կադաստրի պետական կոմիտեի գեոդեզիայի և հողերի վերահսկողության պետական տեսչությունը:
«Շիրակի մարզի 22 համայնքներում իրականացվել են պլանային ստուգումներ, որոնցից 9-ում հայտնաբերվել են խախտումներ, իսկ նշածս չորսում էլ արդեն տուգանքներ են նշանակվել: Հիմնական պատճառը հողերի ոչ նպատակային օգտագործման հետ է կապված»,- նշում է Զ.Խաչատրյանը:
Պեմզաշեն համայնքը, օրինակ, տուգանվել է, քարհատների մեղքով: Բանն այն է, որ 2012 թ. ՀՀ Էներգետիկայի և բնական պաշարների նախարարությունը նոր լեռնահատկացման ակտ է տրամադրել: Նոր լեռնազանգվածը շահագործվել է, սակայն տարածքի սահմանը խախտվել է, և հանքի շխատողները մտել են նաև գյուղատնտեսական նշանակության հողատարածք:
«Առաջին լրատվական»-ի հետ զրույցում Պեմզաշենի գյուղապետ Անան Ոսկանյանը նշեց, որ եղածը մեծ բան էլ չէր, բայց դե, տուգանքը դրվել է, ինքն էլ արդեն մուծել է այն: «Ես կանչեցի հանքատերերին ու ներկայացրի խնդիրը, և արդեն կարող եմ ասել, որ հանքատերերը վնասը վերականգնել են»,- մանրամասնեց Պեմզաշենի համայնքապետը:
Առափի համայնքում արձանագրվել է երկու խախտում: Ինչպես նշում է մարզային պատասխանատուն, մի դեպքում գյուղատնտեսական նշանակության հողատարածքի վրա կառուցվել ու շահագործվել է ավազահանքի լվացման արտադրամաս, երկրորդ դեպքում էներգետիկ և տրանսպորտային նշանակաության հողատարածքը օգտագործվել է որպես բնակելի տան համար նախատեսված հողատարածք: «Վերջին դեպքում տարածքում գործել է նախկինում տրանսպորտային ընկերություն, որը ժամանակի ընթացքում լուծարվել է: Քաղաքացին սեփականության իրավունք է ձեռք բերել այդ տարածքի շինություններից մեկի նկատմամբ ու, առանց հողի նպատակայնությունը փոխելու, այն վերակառուցել ու դարձրել է սեփական տուն»,- նշեց Զորիկ Խաչատրյանը «Առաջին լրատվական»-ի հետ զրույցում:
«Տուգանքն արդեն մուծվել է: Դե, գիտեք, ժամանակի հարց էր, պիտի դիմինք կառավարություն՝ հողերի նպատակային նշանակությունը փոխելու համար, դե, չհասցրինք: Հիմա արդեն գործընթացը սկսել ենք»,- նշում է Առափիի գյուղապետ Ալբերտ Այվազյանը՝ հավելելով, որ ինքը չի կարող կառուցապատողին բան ասել, որովհետու կա հակադարձումը` չթողնեիք, չկառուցեի:
Տուգանված Արևշատ համայնքում էլ գյուղացիները հողը նպատակային օգտագործել են, սակայն իրավական գրանցում ու նոտարական վավերացում չեն իրականացրել: Գյուղապետ Սայադ Խաչատրյանը նշում է, որ ինքը որպես գյուապետ իր գործունեությունը սկսել է 2005 թ., իսկ խախտումները վերաբերում են 2002 թ., այսինքն՝ 13 տարվա վաղեմության են, իրենից առաջ կատարված: «Գրել եմ, բայց դե, իրավահաջորդ եմ, եղել է, պետք է մուծեմ ու սխալներն էլ ուղղեմ, որ հաջորդ ստուգումների ժամանակ սխալ չհայտնաբերվի»,- նշում է Արևշատի գյուղապետը:
Ի դեպ, նշենք, որ հիշյալ տուգանքները մուծում են գյուղապետերը՝ իրենց գրպանից, և ոչ թե գյուղը կամ համայնքային բյուջեն: Ինչպես նկատեց Զորիկ Խաչատրյանը, օրենքը սա դիտարկում է որպես համայնքապետի թերացում և պատասխանատվությունը անձամբ համայնքապետինն է:
