Ուրբաթ՝ հոկտեմբերի 23-ի գիշերը «Նուբարաշեն» քրեակատարողական հիմնարկում դատապարտյալների վրա դիմակավորված անձանց կողմից տեղի ունեցած հարձակումը կազմակերպված է եղել, և այդպիսով փորձ է արվել մեսիջ ուղարկել արդարադատության նորանշանակ նախարար Արփինե Հովհաննիսյանին առ այն, որ նա չի տիրապետում ոլորտին և դժվար էլ կարողանա առաջիկայում գլուխ հանել: «Առաջին լրատվական»-ի հետ զրույցում նման կարծիք հայտնեց հարձակման ականատեսներից մեկը, ում անունը հասկանալի պատճառներով չենք հրապարակում:
Ընդ որում, մեր զրուցակցի խոսքով՝ դատապարտյալների դեմ այդ արշավը կազմակերպված է եղել ՔԿՎ պետի գիտությամբ և հովանավորությամբ, ով, ի դեպ, նախարարի ամենահավանական թեկնածուն էր մինչ այն պահը, երբ Հովիկ Աբրահամյանին հաջողվեց Արփինե Հովհաննիսյանին առաջին պլան մղել:
Հիշեցնենք, որ «Նուբարաշեն» ՔԿՀ-ում դատապարտյալների նկատմամբ բռնությունների մասին առաջինն ահազանգեց իրավապաշտպան Ժաննա Ալեքսանյանը: Նա ուրբաթ օրը երեկոյան ֆեյսբուքյան իր էջում գրել էր՝ տեղեկություն է ստացել, որ նշված ՔԿՀ-ի 6 -րդ մասնաշենք են գրոհել ՔԿՀ վարչության դիմակավորված աշխատակիցները և քարուքանդ արել խցերը, ինչից հետո կալանավորները պատուհաններից սկսել են անօգնական ճիչեր արձակել, շուրջ կես ժամ վայնասուն է եղել, դռներին են խփել: «Սա ահավոր մի իրավիճակ է՝ փակված մարդկանց հետ այսպես վարվել»,- գրել էր իրավապաշտպանը:
Այս արձագանքից հետո պատկան մարմինները շտապեցին հերքել տեղեկությունները, սակայն արձագանքները մեծ էին: Նախարարության և օմբուդսմենի գրասենյակի արագ արձագանքման ծառայությունից արձագանք և այցեր եղան կալանավայր:
Այնուհետև ՔԿՎ ղեկավար Արթուր Օսիկյանը ստիպված եղավ հանդես գալ պարզաբանմամբ, թե հարձակում չի եղել, այլ իրենք տեղեկություն են ստացել, որ խցերից մեկում անթուլյատրելի առարկաներ են պահվում, և իրենց պարտականությունն է եղել ստուգել և հայտնաբերել այդ առարկաները:
Նշենք, սակայն, որ մեր զրուցակցի պատմելով՝ դիմակավորված անձինք դատապարտյալների վրա հարձակվել են գիշերը՝ ժամը 22-23-ն ընկած հատվածում, և եթե ամբողջ խնդիրը խցերում միայն չթույլատրված առարկաներ փնտրելն էր, ինչպես Օսիկյանն էր ասել իրենց տեղեկություն ստացած դատապարտյալին, ապա ՔԿՎ աշխատակիցները դիմակավորված չէին լինի, այլ կմոտենային, կվերցնեին նրա հեռախոսը, ինչպես լինում է հաճախ, և ամեն ինչ այդքանով կավարտվեր:
«Դա ակնհայտ պրովոկացիա էր գիշերվա ժամին: Մոտ 20-30 դիմակավորված անձինք լցվեցին խցեր, ու ծեծուջարդը սկսվեց: Բայց դատապարտյալները շատ շուտ հասկացան դա ու դիտավորյալ աղմուկ բարձրացրեցին՝ հարվածելով խցերի դռներին և այլ առարկաների»,- ասաց մեր զրուցակիցը:
